New Delhi, Lber 13: U Myntri Sorkar Pdeng ba dei khmih ia ka tnat Information and Broadcasting, Anurag Singh Thakur mynta ka sngi u la pyllait paidbah ia ka PB-SHABD, ka jingai jingshakri ha ka jingsam khubor na ka PrasarBharati bad ki website jong ka DD News bad Akashvani News bad ruh ka News on Air mobile app kaba la pynthymmai ha ka prokram ba la pynlong ha National Media Centre, New Delhi.
Ha ka jingai jingkren jong u, u Thakuru la ong ba kane ka dei ka sngi kaba kyrpang ha ki kam information bad broadcasting jong ka ri. “Katba dang iaid ki snem, ka PrasarBharti ka la tei ia ka rynsan ban lum khubor bad ruh ka jingsam ia kane sha baroh ki bynta jong ka ri ha ki ktien bapher bapher.
Mynta, ngi thmu ban iasamia kine ki khubor kiba dei bad ki kotkhubor bad ki electronic media ha India,” u la ong. U Myntri u la ong ruh ba ki lad pathai khubor kin ioh ia ki khubor khlem da hap ban pyni ia ka logo jong ka Doordarshan. Kane ka rynsan kan pynbiang ia ki khubor na kylleng ka ri ha ki ktien bapher bapher.
Kane kan pynkylla ia ki kam pathai khubor bad kan ai jingkyrshan bha ia ki kynhun kiba rit kiba trei ha ki kam pathai khubor ki bym don ka rynsan kaba heh ban lum khubor. Ka PB-SHABD kan long kawei ka tyllong jong ki khubor na ka bynta kine ki kynhun, u la ong.
U Myntri u la pyntip ruh ba ka jingai jingshakri SHABD ka dei kaba ioh ei ha u snem ba nyngkong bad ba kan pynbiang ia ki khubor ha baroh ki ktien ba kongsan jong ka India ha ki sanphew tylli ki thup.
Ha ka jingkren shaphang ki websit ba la pynthymmai jong ka Doordarshan News bad All India Radio bad ka NewsOnAIR app, u Thakur u la ong ba ka All India Radio ka la bteng ban iahapwat ha kane ka por ba kyrhai ki connection mobile bad ka dang long ka tyllong ban ioh ia ki khubor kiba dei shaphang ki skhim bad ki polisi jong ka Sorkar.
Ka app kan don ki bynta bapher bapher kum ki Personalized news feed, push notifications ban ioh khubor mardor shaphang ki jingjia, ka jingpyniasoh ia ki multimedia, ka lad ban pule offline, live streaming na ka bynta ka jingpyni mardor ia ki khubor, ka jingsuk ban iasam lyngba ka social media, ka jingpynbiang khubor katkum ki thain bapher bapher, ka bookmarking ban buh (save) ia ki jingthoh bad ka lad ban wad ia ki khubor.
U Secretary ka tnat Information and Broadcasting, u Sanjay Jaju, ha ka jingkren jong u, u la kitbokkitrwiang ia baroh kawei ka kynhun PrasarBharti na ka bynta ka SHABD bad ki website ba thymmai ha ryngkat ka jingpyllait paidbah ia ka app. U la ong ruh ba kane ka rynsan kan wanrah ia ka jingiatreilang ka ban iarap bha ha ka jingpynbiang ia ki khubor kiba donkam sha kylleng ka ri.
U CEO, PrasarBharti, GauravDwivedi u la ong ba ka PrasarBharti kan iakren bad ki lad pathai khubor bad kan iasam ia ki video, ki dur bad ki jingthoh ba la lum da ka rynsan jong ka.
Ka rynsan PB SHABD ka dei kaba la saindur ban pynbiang khubor man ka sngi lyngba ki video, ki audio, ki jingthoh bad ki dur ia ki lad pathai khubor kiba subscribe. Ha ka jingdon ka rynsan kaba heh jong ki nonglum khubor jong ka PrasarBharati, ki correspondent bad ki stringer, kane ka jingai jingshakri kan pynbiang ia ki khubor na ki bynta bapher bapher jong ka ri.
Lah ban pyndonkam ia kine baroh ban pathai khubor ha ki rynsan bapher bapher. Kum ka jingtyrwa ba kyrpang, yn ai ia kane ka jingshakri khlem da shim jingsiew ka ban iarap ia ki kotkhubor ba kham rit, ki TV channel bad ki rynsan digital. Ia ki jingtip ba kham bniah lah ban ioh ha ka https://shabd.prasarbharati.org/
Ki website ba la pynthymmai jong ka DD News bad Akashvani News bad ka News on Air app kin iarap bha ia ki nongpyndonkam. Ki website ki long kiba suk ban pyndonkam bad la saindur ia ki katkum ka juk mynta ban pynsuk shuh shuh ia ki nongpyndonkam.
Ki nongpyndonkam ki lah ban ioh ia ki khubor, ki prokram ba kyrpang bad ki lah ban ioh ruh ia ki prokram ba kyrpang man ka sngi bad man ka taiew. Lyngba ka jingsaindur kaba itynnad bad ki khubor kiba iar, kine ki website ki kyntiew ia ka jingioh khubor ki briew ha ka rukom kaba sngewtynnad. Ki thup kiba la buh kyrpang ki long National, International, Education, Health, Business and Economy, Science bad Tech, Sports, Environment, bad Opinion.
