Shillong, Naitung 22: Ka president jong ka seng ki nonghikai ka kong B Kharumnuid ka la ong ba na ka liang jong ka FAMASSTA kala khublei kyrpang ia ki khynnah kiba la pass ia ka eksamin SSLC 2020. Haka juh ka por ka seng ka ai khublei kyrpang ruh ia baroh ki nonghikai kiba la trei shitom ha kane ka bynta kaba la pynlong ia ki khynnah ban kin poi sha ka jingjop.
Ha ka juh ka por ka FAMASSTA ka pynpaw ia ka jingsngewkhia kaba jur namar ba kane ka jinglong jingman ka pyrthei kala ktah ia ka jingpule jong ki khynnah, kum ka seng ka kyntu ia ka sorkar kumjuh ki nongpyniaid ba kan wat da kawei ka lat ka lynti ban ai jinghikai ia ki khynnah.
Kawei na ki jinghikai ka dei ka online klass hynrei bun na ki khynnah ki bymdon ia ka lat ban don ia ka internet wat ka computer ne ka mobile khamtam sha ki nongkyndong, kane ka online klass ka long tang kawei na ki bynta hynrei kam lah pat ban ai ia ka jinghikai kaba biang.
Na ka liang jong ka FAMASSTA ka kyntu ia ka MBOSE bad ia ka tnad pule puthi jong ka sorkar ba kan pynlyngkot ia ka syllabus na ka bynta u snem 2020 na ka bynta ki klass X kaba kin pynkhreh ban ia leh ia ka eksam matrik ha u snem 2021 ha kine ki khyndait bnai kin nym lah shuh ban pyndep ia ka syllabus.
Kum ka seng ki nonghikai ka sngew ba ia kane ka bynta dei ban da ia kren paidbah ban ia mir jingmut ban ia shai ba lada long lah ban shim tang ia ki bynta kiba kongsan ban ai jinghikai ia ki samla pule kiba don ha ka klass X mynta, la ong ka kong B Kharumnuid president ka FAMASSTA.
