Shillong, Naitung 12: Ban pynthikna ba kan nym don ka jingialam bakla da ki nongialam niam halor ka jingai dawai Tika ban iada na ka khlam COVID-19 ki nongialam niam kila ai jingmut sha ka sorkar ba dei ban pynshitom ia kito kiba ialam bakla ha ka jingialang kaba la khot da ka tnad ka koit ka khiah ka jylla mynta ka sngi.
Ha kane ka jingialang kaba la pyniaid da u Chief Secretary jong ka jylla u MS Rao ha ka jingiadon lang u Director ka tnad ka koit ka khiah la ia kren bniah bin pa bin ban pynthikna ba kan nym don ka jingialap bakla ban pynshepting ban ai kane ka dawai Tika.
Haba kren ha ki lat Pathai khubor u Director ka tnad ka koit ka khiah u Dr Aman War u la iathuh ba na ka liang jong ki nongialam niam kila ai jingmut ia ka sorkar ba dei ban pynshitom tyngeh ia kino kino ki nongialam niam kiba ialam ba kala ia kane ka jingai Tika ban ia khun pyrshah ia kane ka khlam.
Ha kane ka jingialang ki nongialam niam kila pynpaw ba ki kloi ban ia shnoh kti lang bad ka sorkar ban pynshai paidbah halor ka jingdon kam ban ai tika khnang ba ka jylla kan lah ban ia khun pyrshah ia kane ka khlam hapoh ka jylla.
Kum ki nongialam niam ki pynpaw ia ka jingsngewsih ban ioh sngew halor ka jingpynsaphriang ia ka khubor bakla halor kane ka jingai Tika, ha kane ka jingialang la ai jingmut ia ka sorkar kumno ban tehlakam ia ki nongpynsaphriang ia ki khubor lamler.
U Director ka tnad ka koit ka khiah u la pynpaw ia ka jingsngewkmen ba lyngba kane ka jingiashnoh kti lang ki nongialam niam ha ka jylla ban pynshai sha ki paidbah ia ka jingdon kam ban ai Tika, na ka liang jong ka sorkar ka don ka jingkyrmen ba kane kan sa long kaba jop.
