Shillong, Naiwieng 15: Ka Jylla Meghalaya ka don da ki phew hajar ngut ki nongtrei, ki ba wan khamtam na ki long iing ki ba kham duna ka ioh ka kot, ki ba trei kum ki temporary bad contract employee ha ki tnad trei kam bapher bapher jong ka sorkar jylla, sorkar pdeng ki ba dong ha ka jylla bad ruh ha kiwei kiwei ki company.
La bun bun snem la lap bad tip shai ba ka jingsiew tulop ia kine ki nongtrei temporary bad contract ka long kaba duna haba ia nujor bad ki nongtrei ki la la ioh ka jingpynskhem. Ha ka juk kyrduh kam mynta ki samla ki ba la nangla stad ki la hap ban trei kano kano ka kam kat kaba ki ioh wat lada ki ioh ka jingsiew kaba duna namar ka jingkit khlieh ia la ka jong ka iing ka sem bad ban pynbiang ia ki jingdonkam ha la ki iing ki sem.
Ka iing kashari ba ha khlieh duh jong ka Ri India ka la ong ba ka jingsiew duna ia nongtrei temporary bad contract na ki nongtrei ba la pynskhem ka dei ka jingban being ia ka hok long briew man briew. Ka Iing kashari ka la ong ruh ba kadei ban dong ka juh ka rukom siew tulop na ka bynta ka juh ka jait kam khlem da pyniapher ba kidei ki temporary bad contractual lane ki ba la pynskhem.
Ka KHNAM State Youth Wing ka ai ka jingiaroh ia kane ka rai jong ka iing bishar ba ha khlieh duh. Ka KHNAM SYW ka dawa ba ka sorkar jylla kadei ban siew ka juh ka tulop ia ki nongrei ki ba trei ka juh ka jait kam khlem da pynia pher la kidei ki regular ne ki temporary. Ka sorkar jylla kadei ban pyntrei kam ia kane ka rai jong ka iing bishar ba ha khlieh duh khlem da pynslem shuh. Ka seng kan sa long ka ba wad bniah na ki tnat trei kam bapher bapher halor kane.
