Shillong, Naiwieng 29: Ka seng All Meghalaya SSA School Teacher’s Association (AMSSATA) mynta ka sngi kala phah da ka jingthoh sha u Lat jong ka jylla u V Shanmuganathan ban pyntip b aka sorkar pdeng kala dep ban pynkiew ia ka tulop jong ki nonghikai SSA naduh ka shitarik jong u bnai Iaiong mynta u snem bad ia kane ka rai jong ka Project Approval Board la dep ban phah sha ka sorkar jylla.
Katkum katei ka jingpyntip jong ka sorkar pdeng sha ka sorkar jylla ka long ba ia ki nonghikai LP School la pynkiew sha ka T.19044 tyngka bad ia ki UP School la pynkiew sha ka T.20493 tyngka. Ha kane ka jingthoh na ka liang jong ka seng kala ong ba la da ka sorkar ka kwah ban pyniapher ia ki nonghikai ka dei ban shimti noh ia ki nonghikai SSA kum ki nonghikai jong ka sorkar jylla.
Na ka liang jong ki nonghikai jong ka SSA ki dawa ba ka sorkar ka dei ban pynlait noh ia ka tulop ka jong ki ha shuwa ka 20 tarik jong u bnai Nohprah. Ka seng kala lap ba na ka ophis jong ka SSA ba ka sorkar pdeng kam shym la pyniapher ban siew ia ka tulop jong ki nonghikai ia kiba la shah pybtbit bad ia ki bym pat shah pyntbit.
Na ka liang jong ka sorkar pdeng kala siew ia ka tulop jong ki nonghikai SSA ha ki LP school ka tulop ba rim ka long T.9,200 tyngka bad kiba hikai ha ki UP School ka long T.9,900 tyngka bad ha kane ka jingpynkiew thymmai pat ia ki LP School ka long T.19,044 tyngka bad ia ki UP School pat ka long T.20,493 tyngka.
Hynrei kaba sngew lyngoh ka long ba ynda ka poi sha ka sorkar pat ka long ba ia ki nonghikai LP School ka jingsiew kaba rim ka long T.9,200 tyngka katba kaba thymmai ka long T.13,335 tyngka, ia kiba hikai ha ka UP school ka tulop ba rim ka long T.9,900 tyngka kaba thymmai pat ka long tang T.14,392 tyngka.
U Bah Bah L Marngar president jong ka AMSSASTA, u la ong b aka jingshah khate ha ka sorkar jylla ka long T.6001 tyngka ia ki LP School bad ha ki UP School ka jingshah khate ka long T.6101 tyngka na kaei kaba la mang da ka sorkar pdeng.
