Shillong, Rymphang 24: Ka St. Paul’s Seminary, Upper Shillong, ka Shlem ai jinghikai ia ki khun Samla ban long ki Nongialam ha ka imlang sahlang bad ka Balang, kan sa pynhap pyrda iaka Diamond Jubilee ha ka 1 Tarik Lber 2022.
Lah ban pynkymmaw hangne ba la seng ia ka da u Bishop Stephen Ferrando ha u snem 1962, da ka jingiarap lem u Rev. Fr. Mario Bianchi, u Secretary jong u. Ka tarik ba la sdang ka long 1 tarik Lber (March) 1962.
U Director banyngkong tam u dei u Fr. Virgilius Albera bad ki nongiarap jong u dei u Fr. Michael Devalle bad u Brodar Paul Sebastian. Kiba bun na kitei ki dei ki Mishonari na Italy.
Ha kine ki 60 snem lajan lai hajar ngut ki samla shynrang ki la ioh “Training” ha katei ka jaka bad la jan ar-spah ngut ki la poi sha ka kyrdan Lyngdoh-Niam jong ka Balang Katholik.
Kiwei pat ki la bteng ia ka jingshakri ha ki kam bapher bapher ha ka im-lang sah-lang. Sngewhun jrut ba kiba bun na kine ki dang bteng ban ai ka bhah ka bynta kaba kordor ha ki kam ba ki trei.
Ha katei ka jingrakhe pynkut Jubilee, ha ka 1 tarik March, 2022, la khmih lynti, ia ki Samla-pule barim bad Nonghikai barim ban iapoi lang ban kynmaw sngewnguh ia kane ka iing kmie .
Ka program mynstep kan long ka jingai-nguh Blei, bud sa ka jingkynmaw burom ia kine ki 60 snem, ha ka por mynsngi, kane ka long katkum ka kyrwoh kaba la phah da u Phadar Silvanus Nongkynrieh ba dei Rector kane ka jaka ai jinghikai.
