Nongpoh, Naitung 11: U myntri rangbah ka jylla u Dr Mukul Sangma haba kren ha ka jingialang paidbah mynta ka sngi ha Umsning ha kaba ia dei bad ka jingpyntrei kam ia ka skhim Chief Minister’s Social Assistance (CMSA) u la pynbna ba ia ka Block Headquater kaba thymmai kan don ha Umroi.
Haba ia dei bad kane ka skhim kaba dei na ka CMSA, la ong ba kan don kano kano ka jingkhang ha kaba ia dei bad ka rta lada ki dei kiba don ka jingduna ha ka dkhot met lane ki kynthei kiba la iap noh u lok jong ki. Lyngba kane ka skhim ka sorkar kan siew T.500 tyngka ha ka shibnai.
Ia kane ka skhim la pyntrei kam lyngba ka tand Social Welfare Department. Na ka liang jong ka sorkar ka kwah ban pynpoi ia ki kam pynroi sha ki paidbah kiba dei hok ban ioh ia ki lad jingiarap jong ka sorkar bad ka tand pathai khubor jong ka sorkar jylla kan ia treilang bad ka Social Welfare ban pynphriang ia ki skhim sorkar.
U myntri rangbah haba kren ha kane ka jignialang u la ong ba bun bah ki skhim kiba ka sorkar kala pynkhreh ban pyntrei na ka bynta ban kyntiew ia ka ioh ka kot jong ki paidbah ha ki nongkyndong na ka bynta ban kyntiew ia ka ioh ka kot jong ki paidbah.
Kiwei kiba la kren ha kane ka jingialang ki long u Dr C Lyngdoh MLA jong ka Umsning, Bah Ngaitlang Dhar MLA jong ka Umroi, ha kane ka sngi la don lang ruh u Bah HM Shangpliang Director ka tand Social Welfare.(SP News)
