Shillong, Naiwieng 29: U Bah Pyndap Saibon president jong ka seng KHNAM mynta ka sngi la pynbam smai ia ki lai ngut ki kyrtong jong ka seng ha khmat jong u mot Tirot sing ha State central library ban pynkynmaw ia kine ki lai ngut ki kyrtong ba kin ia neh ha ka seng ynda kila jop ia ka election.
Ki lai ngut ki kyrtong jong ka KHNAM kiban ia khun ha kane ka election MDC shiteng samoi ki long u Bah Edarstar Lyngdoh Nongbri na Nongkrem , u Bah Bankhraw sing Kharbuli bad u Bah Pyndapbor Lyngdoh Marshillong kine ki lai ngut ki kyrtong jong ka KHNAM kila pynpaw ba kin burom bad ia neh hapoh ka party.
U Bah Saibon u la ong ba kum ka seng kan nym lah ban the la kam ia ki MDC ynda kila jop ia ka election ka jong ki hynrei kane kajingpynsmai ka long ba kin sngewthuh bad ban pynkynmaw ia ki ba kila jop na ka party.
Halor ka jingbym pynieng ia ki kyrtong ha baroh hynñiew tylli ki konstitwensi ka long ba ka seng kam kwah ban shu ai tiket pathar, ka kwah ia ki briew kiba don ka jingsngewthuh ban buh ia ka jaid bynriew ha khmat, ki briew ki don kiba la wan ban pan tiket hynrei ka seng kam lah ban pdiang ia ki.
U Bah Saibon u la ong ba kala don kam ia ka ain ban khanglad ia ka jingkyntiap seng hapoh jong ki District Council, kane ka jingpynsmai ia ki kyrtong ka party ka long ban pynsngewthuh ia ki ba kin bat iala ka kular badkin trei na ka bynta ka roi ka par jong ka constituency kaba ki mih khmat bad ka jaidbynriew.
Ha kane ka sngi u Bah Adelbert Nongrum working president jong ka party ruh u la ia don lang ban sakhi ia kane ka jingpynsmai ia kine ki kyrtong jong ka party ha ryngkat ki nongkit kam jong ka seng.
