Shillong, Lber 11: U Symbut myntri rangbah ka jylla u bah Prestone Tynsong ba dei peit ruh ia ka tnad kam bor ding ka jylla haba jubab ia ka jingkylli u bah Adelbert Nongrum la ong ba lada siew ia ka bai light da ka online ka MePDCL ka siew ia ka bai “Gateway Payment”.
Ka dor kaba kiba ring light lada dei kiba shu pyndon kam ha iing, ka jingsiew ka long ia ka bai light kaba ki pyndon kam bad ka jingsiew kaba kihap ban siew T.60/- tyngka lada dei u meter ba shikilo watt ka ram kaba ka MeECL ka shim ka long na ka bynta pyniaid ia ka.
Katkum ka kyndon kaba la buh da ka MSERC ka long ba lada ka jingsiew ia ka bai light ka long palat ia ka sngi kaba la buh kan dona ka jingdain kuna kaba 1% na ka bai light bad kane ka long na ka bynta man ka 30 sngi.
Haba jubab ia ka jingkylli bynrap, la ong ba ka MeECL ka siew T.2.50 tyngka sa ka kompeni ba pyniaid ia ka Gateway Payment bad lada ka dei ka jingsiew palat ia ka dei dei ka kam jong ki bank ba ki shim ia ka bai pynsiewlem lyngba jong ki.
Haba jubab ia ka jingkylli bynrap jong ka kong Amapreen Lyngdoh, u bah Prestone la ong ba kam don kata ka jingai light ei , hynrei ka don tang kaba pynring ei ia ka light sha ki jong kito kiba dei hok ban ioh, hynrei ia ka bai meter, ka bai light kaba ki pyndon kam ki hap ban siew.
Ka MeECL kala sdang ban pyndon kam ia kane ka Gateway Payment naduh u snem 2014, kaba ki briew ki lah ban siew ia ka bai light online, nalor kane ki don ruh sa kiwei ki rukom siew ia ka bai light kaba ki briew ki lah ban siew.
Haba jubab ia ka jingkylli bynrap u Zenith Sangma na ka liang jong u symbut myntri rangbah la ong ba ka MeECL kam pat lah ban pyniaid ia ka Corporation na ka jingmih ka jong ka dei na kane ka daw ba la hap ban shim ram.
