Shillong, Lber 11: Mynta ka sngi kawei ka trok kaba kit nar rot ynda poi ha Umshongker Larem ha jan ka shnong Nongsynrieh kala hap na kadaw ba ka jingkieng kala kdiah ha ka por ba dang iaid ha katei ka jingkieng.
Katkum ki khubor kiba la ioh na katei ka jaka la ong ba kane ka jingkieng ka hap hapoh ka jingpeit jong ka Mawsaw PWD Division hapoh jong ka South West Khasi Hills District, la ong ha kane ka jinghap kane ka trok kam shym don kano kano ka jingjia ba sngewsih.
Katkum ka jingithuh ki briew na katei ka jaka la ong ba kane ka surok ka long kaba kongsan kaba pyniasoh ban leit sha Nongstoin, Mawkyrwat, Pariong bad sha Shillong, ka jingkdiah katei ka jingkieng kan ktah ia ka leit ka wan ki paidbah katei ka thain.
Katkum ka jingkren ki briew na katei ka thain la iathuh ba kane ka jingkieng ka dei kaba lah ban iaid ki trok kiba hap ban kit tang khyndai metric tone, hynrei mynta ka sngi kane ka jingkieng kala kdiah ha ka por ba iaid katei ka trok kit nor rot.
