Jowai, Iaiong 25: Ka KSU Jaintia Hills District Unit ka pynpaw ia ka jingpyrshah jur ia ka Sorkar Meghalaya halor ka jingiohlad jong ki bor pulit Assam ban thombor ia ki paid Hynniewtrep ba sah hapoh ki thain Block 1(Pangam Raliang/Elaka Labang Nangphyllut) bad shilynter ki thain Khappud jong ka Meghalaya -Assam kum ha Khanduli, Mukroh bad Psiar bad kiwei.
Mynnin bad mynta ka sngi 25 tarik u iaiong, ki pulit jong ka Assam ki wan tur sha ka shnong Psiar bad khang ia ka Sub -Centre ai dawai bad beh ia ki nongtrei(ki nos) bad rah ruh ia ka signboard jong katei ka sub centre bad bthah ia ki nongtrei ba kim dei ban wan trei bad haba la ong ia ki ban ai da ka jingthoh, kitei ki pulit kim lah ban ai’, la pynpaw u Rangbah shnong ka shnong Psiar.
Kum kitei ki jingleh jong ki bor District Karbi Anglong ka pynsyier iaka iaid ka ieng bad ka shong ka sah bad ka trei ka ktah ki paid Hynniewtrep kiba sah ha kitei ki thain bad ruh ia kiba dei iaid nangtei. Kham mynshuwa ka don ka jingbyrngem, ka jingdawa pisa, ka jingpynthut ia ka khaii ki paid Khasi -Pnar kaba pyndiaw ia ki paidbah ba sah ha kitei ki thain ban duh jingkyrmen ha ki bor district ka Meghalaya.
“Ka jingsieh Mawpud ha Mukroh , ka jingthwet ia ki nongialam shnong ha khanduli, ka jingthmu pynduh ia ka jaka ai dawai ha PSiar bad ka jingbyrngem/dawa pisa ia ki paradoh parasnam ba sah ha kitei ki thain khappud jong ka Meghalaya ka long ka jingthom ia ka hok longbriew manbriew bad ka jingbym burom ia kaei ba kum ki bor District ka WJHD bad Karbi Anglong District ki la ia khlei ha ki snem ba la lah; kata ba ki dei ban leh da ka jingiatip lang. Ka seng ka kwah ban tip hato ka Assam ka leh ia kine ki kam da kaba pyntip ia ki bor WJHD ne kumno? Hato kum kine ki jingthombor kin wanrah jingshongshngain?”, la pynpaw u samla S. Niangti. General secretary ka KSU JHDU.
“Ha man la ki por ba la jan poi ka jingiakren ban pynbeit ia u pud u sam, ki pulit Assam ki mlien ban thombor bad leh ia ki kam pyntriem ha ka jaka ban wanrah jingsuk ha kine thain. Ngi pynpaw ia ka jingpyrshah jur ia kum ki jingleh ka sorkar Assam kaba la iasylla ruh bad ki kaikhlaw karbi ban pynthut ia ki paid Khasi Pnar ha ka thain Block 1. Ngi pyrshah ruh ia ka sorkar Meghalaya ia ka jinglong mynthi jong ka halor ka jingbym ai pahara (kum kaba buh Police Outpost ha Psiar, Mukroh) bad ka jingpynslem ban ai ka jubab ba skhem na ka bynta ban wanrah ia ka thain Block 1(ne Elaka Labang Nangphyllut/Pangam Raliang) shapoh Meghalaya”, la pynpaw u ma Ohibait Dkhar, VicePresident ka KSU JHDU.
Lyngba kane ka kyrwoh, ka KSU JHDU ka maham ruh ia ki dalal jong kilehnoh karbi bad ki riew khwan myntoi shimet/ingkhong shyllangmat, kiba long ki para jaid jong ngi, kiba pyrshang ban pynsngewthuh bakla bad pynsmiej ia ki paid Khasi basah hapoh Block 1(ne Elaka Labang Nangphyllut/Pangam Raliang).(SP News)
