Shillong Naiwieng 23: Ki nongdie doh masi hapoh ka lama jong ka Khasi Jaintia Butchers Association (KJBWA) kila shim iaka rai ba naduh ka Sngi Thohdieng mynta ka taiew kin sangeh shi syndon iaka jingleit thied masi na Iew Khanapara, Ri Bhoi District katba ka tnad Animal Husbandry and Veterinary ryngkat bad ka Hima Mylliem bad KHADC kin pyntreikam beit ia ka jingleh check up ne khmih bniah bad ban pyndait ia ki Ear Tag ha ki masi.
“Kane ka jing bym leit thied masi shuh ka jong ngi na Iew Khanapara kan sdang naduh ka 25 tarik mynta u bnai (Sngi Thohdieng) katba ka KHADC bad Hima Mylliem ka dang khanglad iaka Veterinary ban pyntreikam iaka jingkhmih bniah ia ki masi bad ban pyndait ia ki ear tag ia ki masi” ong u Vice President ka KJBWA, u Bah Generous Warlarpih hadien ka jingwan iakynduh ia u Director ka tnad Animal Husbandry and Veterinary u Dr B Rijai, hynin ka sngi ha ryngkat ka jingsynranlang ki nongialam ka FKJGP seng kmie hapoh ka jingialam u General Secretary u bah Dundee Cliff Khongsit.
Ki nongialam ka KJBWA bad FKJGP seng kmie kila pynpaw iaka jingsngewnguh ia ka tnad Veterinary halor ka jingsdang iaka check up ia ki masi, shwa ban wanrah sha kane ka jylla bad ban pyndait da ki kynja tiar iaki skhor ia ki masi ha Iew Khanapara, ban tehlakam iaka jing shalan tuh iaki masi sha Bangladesh.
U Bah Generous Warlarpih Vice President ka KJBWA ula ong ba watla kane ka jingleh ka Veterinary ka long kaba biang tam hynrei kynsan kynsan la ioh jingtip ba u Syiem ka Hima Mylliem naduh ka taiew ban wan un pynsangeh noh ia kane ka jingpyndait da ki kynja tiar haki skhor jong ki masi.
“ U Executive Member ka District Council uba khmih iaka iew ka hat u Bah Hedrian Lyngdoh ula pynpaw ba yn nym lah ban pyntreikam ia kane ka jingleh check up ne khmih bniah bad ban pyndait ia ki Ear Tag ha ki masi, namar ba ka don ka jingkhrong pisa be-ain” ong u bah Warlarpih.
U Bah Warlarpih ula ong ba ha ka jingpyndait iaki ear tag la shim T.15 ia uwei u masi bad T.10 uwei u masi na ka bynta ka jingleh check up bad baroh ka kot T.25 tyngka naka bynta uwei u masi bad ia kane hap siew da ki nongthied masi, hynrei ym shim la don mano mano ban ujor halor kane hynrei ka KHADC bad u Syiem Mylliem kila tuklar halor kane ka kam.
“Kine ki artylli ki tnad treikam ki pynsuba jur ia ngi ba ki don eiei sha lyndet namar shisien ba la pyndeng ia ki ear tag ka pynshisha ba kidei kiba biang ban bam doh bad kan buh ha ka jingeh ia kito kiba ju donkti ha kaban shalan tuh sha Bangladesh ia ki masi” ong u Vice President ka KJBWA.
Ula ong ruh ba kane ka jingthmu ban pynpulom iaka jingthmu ka sorkar kan pynlong ia ki nongot doh ba kin die rem ia ka masi namar ba kan long ka jinglaitluid ia ki riewshimkabu ban khaii masi be-ain sha Bangladesh.
Na ka liang u bah Khongsit ula ong ba ka FKJGP ka ai ka jingkyrshan iaka sorkar halor ka jingthmu kaba bha naba kane kan long shwa tang ka jingsdang ban leh check up ia ki masi shwa ban bam doh ha kane ka jylla bad ka seng ka kyrmen skhem ba ka sorkar jylla kan sa check up ruh ia ki sniang, ki syiar, ki blang bad kiwei kiwei shwa ban bam doh ia ki kaban long ka jingmyntoi bad ka jingkyrkhu ia ki paidbah kiba bam doh khnang ba kan pynthikna ba kan ym ktah iaka koit ka khiah jongki bad ka long kaba shngain ia ki paidbah ban bam doh masi.
Ka FKJGP kala dawa na tnad Animal Husbandry and Veterinary ba kadei ban iaid shakhmat ban pyntreikam ia katei ka jingthmu na ka bynta ka bit ka biang u paidbah watla ka iakynduh ia ki dieng pyngkiang, hynrei ka sorkar kadei ban iaid shakhmat da kaba bud ryntih ia ki kyndon jong ka Animal Transport Rules 2001 katkum ki Rules 97 & 98 bad kam dei ban sngap iano iano ruh namar ba kadei ka jingiohnong ia u paidbah.
