Mawkyrwat, Jymmang 27: Ka KSU Rangthong Unit hadien ba ka la ioh sngew ia ka jingud jingnam jong ki nongtrei ka Rangthong PHC halor ka jingbymioh um naduh kane ka taiew ba lah dep khlem da pynslem marmar ka la leit iarap ban pynioh um ha katei katei ka PHC bad ki quarter ba sah ki nongtrei.
Ka Seng ka pynpaw ia ka jingsngewkhia halor kane ka bynta khamtam kane ka PHC ka dei ka ba la ai jingshakri ym tang ia ki paitbah hapoh shnong hynrei ia ka dong thaiñ hi baroh kawei, ka Seng ka ai mynsiem ruh na bynta ki nongtrei ka PHC ki ba la trei shitom ha ka ban ai jingsumar ia ki paradoh parasnam khamtam kum ha kane kapor ba ngi don hapdeng ka thma ban iakhun pyrshah ia ka khlam covid – 19.
Ka Seng ka pynpaw ka jingkhublei ia ka office PHE Mawkyrwat, Bah Kitbor Nongrem (Myntri Shnong Rangthong) ba ki la shimkhia ban wan maramot kloi ha ka ba iadei bad ka jingthud ka um hapoh shnong ha kaba ki paitbah ki la mad jingeh, khamtam ha kum kane ka por ba ka shnong ka don ha ka jingkhang shnong.
Ha kanjuh ka por kum ka seng ka ba juh peit ia ka bha ka miat ka ri bad ka jaitbynriew ka kyntu ia ki paitbah nongshong shnong ba kin long kiba phikir bad sumar bha ialade da ka ba bud ryntih ia ki kyndon ba la bthah da ka tnad ka koit ka khiah.
Ka Seng ka dawa na ka sorkar ba kan pynbiang Ambulance namar kumba ka long mynta kane ka PHC ka ba ai jingshakri ia ki phew tylli ki shnong ka don tang kawei ka Ambulance ka ba la rim, lah bun ba shu hap ban repair haba leit jingleit na bynta ki kam ka PHC bad ka jingdon tang kawei ka ambulance ka la ktah shisha namar hap ban kitlang ia ki nongpang.
Ki longkmie ba armet bad ki ba don positive case covid – 19 ha kajuh ka kali kaba la long pyrshah katkum ki protocols ba ka sorkar hi ka la buh, lehse kane ka buh jingma ia ki ba bun ba lang, la ong u samla Pynskhemborlang Shangdiar President bad samla Hamir Syiemlieh General Secretary KSU Rangthong Unit.
