Shillong, Nailur 22: U Chairman jong ka Meghalaya Tourism Development Corporation (MTDC) u Bah David A Nongrum, u la ong ba ka ‘Board of Directors’ kala khot hajir ia u Bah Leslee Shylla ha ka 30 tarik mynta u bnai ban ia kren halor ka Crowbrough kaba la sah teng mynta wat la ka corporation kala dep ban aiti ha u ha dien ba la ia soi ia ka jingiateh kular ha u snem 2008.
Haba iakren bad u SP News Agency, u Bah Nongrum u la ong ba na ka liang jong ka MTDC kam don jingduh nong ei ei ruh em namar ba ki ioh ia ka bai wai, hynrei kaba kongsan ka long ba kane ka hotel kaba la sah mynta la bun bun snem ki kwah ban iohi ba kan dep noh.
Halor ka jingpan jingpynshai jong ka MTC ia kaba la phah sha u Bah Shylla da ka ‘show Couse Notice’ na ka liang jong u Bah Shylla u la jubab ha dien ka 15 tarik jong mynta u bnai, dei halor kane ka jubab ba ka BoD ka sa khot hajir ba un wan ban jubab ha khmat jong ka Bod ha ka 30 tarik.
Haba jubab ia ki jingkylli, ha kaba ia dei bad ka Aura Hotel kaba na Guwahati kaba u Bah Shylla u la ia treilang mynta, u Bah Nongrum u la ong ba ka ophis ka ithuh ia u briew u ba kila ia soi ia ka jingiateh kular, kim ithuh ia kata ka Aura Hotel, lada jia ei ei ruh ka MTDC kan wad ia u Bah Shylla.
Lada u Bah Shylla u la iathekular ban ia treilang bad ka Aura Hotel, u dei ban pyntip sha ka ophis namar ki don ki kyndon kiba la iasoi ha ka jingiateh kular kaba u nongshim wai um lah ban ai wai kylla shawei. Lada dei ban ai shawei ka ophis ka hap ban pynduh shuwa ia ka jingiateh kular bad kan sa khot thymmai ia ka tender.
Na ka liang jong ka ophis kam kwah ba ha kane ka kynti kaba mynta kan poi sha kano kano ka bynta, hynrei kan ia kren sngewthuh jingmut ban iohi ba kane ka jingtrei ia ka Crowbrough Hotel ka dei ban dep ba kan logn ka burom ia ka jylla.
La ong ba ka dei ka jingshisha ba kane kala long ka jinglehrain ha khmat jong ki paidbah, dei na kane ka daw b aka MTDC ka kwah ban iohi ba kane ka jingtrei ka dep noh.
