Shillong, Lber 14: U Myntri Rangbah ka jylla u Conrad K Sangma mynta ka sngi la ong ba ka sorkar kala pynmih mynta ka sngi ia ka jingtyrwa sha ki paidbah “Expression of Interest” ba lada don kino kino kiba don jaka kin sngewbha ban tyrwa sha ka sorkar ba kan thied na ka bynta ban shna ia ki karkhana.
Mynta ka sngi umyntri rangbah ka jylla u la pynbna paidbah ia ka “Meghalaya Invest” ban khring ia ki riew shimet ban wan seng kam ha kane ka jylla, ka jingkwah thied jaka ka sorkar ka long ba pynkylla ia ki kum ki Industrial Area bad ban ai sha ki briew kiba ban seng ia ki karkhana.
Ka jingkwah ka sorkar ka long ban pynsuk ban pynioh jaka na ka bynta kiba kwah ban seng karkhana, lyngba kane ka “Meghalaya Invest” ka long ban pynpoi ia ka kamai ka jih jong ka jylla sha ka 10 billion US Dolars ha u snem 2028, bad ka sorkar ka buh ia ka thong ba ki riew shimet kin wan ban seng kam kan kit sha k 1 Billion US Dolars.
Ha kane ka liang ka sorkar kan ai ruh ia ka jingiarap sha ki karkhana katkum ka North East Industrial Police (NEIP) ha kine ki shipew snem ka sorkar kan pynlut T.700/- klur tyngka bad na ka NEIP kaba la mang ia ka jylla Meghalaya T.600/- klur tyngka.
La iathuh ba la dep ban ia soi bad phra tylli ki Kompeni ban wan seng kam ha kane ka jylla bad ka jingpynlut ka jong ki ban sdang ia ki kam ki jam kala kot sha ka T.2957/- klur tyngka bad katkum ka Industrial Policy kaba thymmai la pynduh noh ia ka “Single Window Agency” bad la thaw iaka “ Meghalaya State Investment Promotion & Facilitation Authirty”.
Haba ia dei bad kane ka bynta na ka liang jong u myntri rangbah ka jylla u la ong ba ia ki kot ki sla kiba don kam baroh baki tnad sorkar bapher bapher kin ai ia ki jingbit yn buh da ka por bad lada kim lah ban ai ha ka por ba la buh, ymshim beit bala dep la ai jingmynjur. U myntri rangbah la ong ba kane ka dei ka jingleh ban pyntrei kam ia ki 10 tylli ki mat kia la kren ha mang tyngka 2024-2025.
Haba jubab ia ki jingkylli na ka liang jong u myntri rangbah la ong ba ka dei ka jingshisha ha Meghalaya ki don lai tylli ki District Council ha kaba ka sorkar ka don kam ban ia treilang bad ki ban ioh ia ki jingbit, la ong ba da don ki aplikohson yn sa shim khia na ka liang jong u ban ia kren ban pynioh iaki jingbit.
