Shillong Naiwieng 14: U Chief Secretary, jong ka jylla Meghalaya u KS Kropha mynta ka sngi u la khot ia ki heh jong ka RBi bad ia baroh ki heh jong ki bnak bapher bapher ba don ha kane ka jylla Meghalaya ban ia kren bad ki ban peit ba kan nym don kano kano ka jingduna ka pisa ha kane ka jylla bad ba kan nym ktah ia ka ioh ka kot jong ka jylla.
Ha kane ka jingiakynduh bad ki heh jong ki bank, na ka liang jong u Chief Secretary ka jylla u la bthah ia baroh ba ki dei ban peit ba kan nym don kano kano ka jingthut ha kine ki sngi ki ban dang wan ruh ha ka jingtrei kam jong ki bank na ka liang jong ki bank ruh kila ong ban pynthikna ba baroh ki ATM kiba don ha ka jylla kin trei kam.
Ha kane ka jingialang na ka liang jong ki bank kila iathuh ha u Chief Secretary b aka pisa ka don bad kam don jingduna ei ei ruh bad k aba bun ka pisa kaba la poi sha ki bank ka dei ka lut ar hajar tyngka, la kyntu ruh na ka liang jong ki bank ia u Chief Secretary bad ym ia kren bad ka sorkar pdeng ba kan pynpoi ia ki lut rit.
La bthah ruh ha kane ka jingialang ia ka SBI ba ka dei ban ai pisa kham buh sha ka tnad phah shithi jong ka sorkar pdeng. Na ka liang jong u CS u la bthah ia ki bank ba kin ia kren bad ki Deputy Commissioner kumno ban leh ban pynpoi ia ka pisa sha ki iew nongkyndong khamtam ha ki sngi iew ha ki jaka bym don ki Bank da kaba shim ia ka jingphara jong ki pulit.
Na ka liang jong u Chief Secretary u la ong ba ka sorkar kala shim ia barohki lat ki lynti ban peit ba kan nym don kano kano ka jingdkhoh ha kaba pynpoi ia ka pisa sha ki paidbah ha kane ka por ba don ka jingkylla.
