Shillong, Iaiong 12: Ki nonghikai hapoh jong ka lama, ka Meghalaya SSA School Teachers Association (MSSASA) kila shim ia ka rai ba kin pynlong ia ka jingiakhih da kaba pep leit hikai naduh ka sngi ba ar lada ka sorkar kam ai ia ka jinhgdawa ka jong ki, ia kane ka rai la pynbna da u president u Bah Aristotle Rymbai ha ka jingialang paidbah ha jan additional secretarit mynta ka sngi.
Kane ka kynhun kinonghikai kiba don hapoh jong ka MSSASA ki kynthup ia ki nonghikai kiba saw bad ia ki nonghikai kiba khlem pat ioh ia ka result jong ki kiba la shah pyntbit kyrpang hapoh jong ka NIOS kumba la phah da ka sorkar, ha kaba ka jingsiew ia ka tlup jong kine ki nonghikai kala ia pher bad kito kiba la dep ia ka jingshah hikai ha ka NIOS.
U President jong ka seng MSSASA u Bah Rymbai, ha kaba kren ha ki nongthoh khubor mynta ka sngi ha dien ka jingialang jong ki, u la ong ba lada ka sorkar kam lah ban pynurlong ia ka jingdawa jong ki ha kine ki sngi, ka seng kala shim ia ka rai ba kin pynlong ia ka jingiakhih da kaba pep leit hikai naduh ka sngi baa r.
Kiwei ki jingdawa ka long ba ka sorkar ka dei ban pynmih noh ia ka result jong ki nonghikai kiba la leit ban shah hikai kyrpang ha ka NIOS kumba la phah da ka sorkar bad lada ka sorkar ka shim ia ka rai ban pynkiew ia ka tulop ka dei ban shai naduh u bnai bad u snem aiu bad ka dei ban ai sha ka seng da ka jingthoh.
Ka jingiaid paidbah mynta ka sngi kala sdang na Madan Iewrynhep Laitumkhrah bad kila pynkut ha additional secretariat bad ha kane ka jaka kila pynlong ia ka jingialang paidbah bad la thang ruh ia ka dur bula jong u myntri rangbah ka jylla kum ka dak jong ka jingpyrshah ia kane ka jingleh kuman jong ka sorkar.
