Shillong, Lber 07: U myntri ba dei peit ia ka tnad ka koit ka khiah u James K Sangma haba jubab ia ka jingkylli u bah Himalaya M Shangpliang la ong na ki nongtrei ka tnad ka koit ka khiah kiba khlem pat ai tika COVID-19 ki don 2505 ngut bad 10% kim kwah ban ai Tika.
U myntri u la ong ba katkum ka jingwat bniah ka Indian Institute of Public Health (IIPH) Shillong la ong ba ki don bun ki daw ba ki pynpaw balei kim kwah ban ai Tika COVID-19, tang na ki nongtrei ka tnad ka koit ka khiah ka sokar kiba khlem pat ai tika ki don 2456 ngut bad ha ki hospital jong ki riew shimet ki don 49 ngut.
Haba jubab ia ki jingkylli bynrap na ka liang jong u myntri la ong ba ki nongtrei ka tnad ka koit ka khiah jong ka sorkar baroh ki don 28400 ngut, ki doctor kiba khlem pat ai Tika ki don 93 ngut, ki Nurse 462 ngut bad kiwei ki kyrdan kiba don ha ka tnad ka koit ka khiah ki don 434 ngut.
Na ka liang jong ka sorkar kala pynlong ia ka jingiamir jingmut bad ki nongtrei ka tnad ka koit ka khiah ban pynsngewthuh ia ki ba kin pdiang ia kane ka jingai tika, ha dien kane ka jingai jingtika kala kiew sha ka 80%, kiba la ai tika ha ka bynta kaba nyngkong ki don 70% bad kiba la dep ia ka tika kaba ar sien ki don 57%.
U Myntri ka tnad pynroi nongkyndong u Bah Hamletson Dohling haba jubab ia ka jingkylli bala buh da u Zenith M Sangma haba ia dei bad ka jingpyntrei ia ka skhim MGNREGS la ong ban siew ia ka bai tiar ka shong ha ka jingpeit ki BDO.
Haba jubab ia ka jingkylli bynrap jong u bah George B Lyngdoh u mytnri la ong ba ka pisa kaba sah baroh ba dei ban hap ban siew sha ki nongshallan mar ka long T.342 klur , ha kane ka skhim ka jingbei pisa ka long 75% na ka sorkar pdeng bad 25% na ka sorkar jylla.
