Shillong,Jylliew 14: Ka Meghalaya Joint Council of Trade Union and Association ka la pynlong ia ka jingialang katba 7 ha ITEF Conference Hall ha kaba ki la ia pyrkhat ia kiba bun ki kam kiba ia dei bad ki jingjia kiba la jia ha ka jylla baroh kawei.
Kane ka seng ka la ia phylliew jingmut kiba kiba bun ki jingjia kum ka jingshah pyniap ka Josbina M Sangma ka longkmie ba 35 snem karta ha Chokpot,Garo Hills ha ka 03.06.2014 ha ki kaikhlaw ha khmat ki khun ha kaba kane ka jingjia ka la saphriang kylleng shabar ka pyrthei ruh,ki paidbah jong ka ri lum Garo la bun snem mynta ki im ha ka jingtieng jingsyier namar ba ka jur palat ka jingpyniap briew, ka jingrah bor, ka jingdawa pisa bad bun rukom ki kam sniew ha kaba ka briew ki im ka jingim kaba syier na ki kam leh donbor jong ki kaikhlaw ha kaba ka suk ka saiñ ha kane ka thaiñ ka la hiar palat kat dang mih ki sngi.
Sa kawei pat ka jingjia kaba la ktah ia ki paidbah jong ka jylla ka long ka jingkhang tih dewiong liew khnai da ka NGT kaba la buh da ka aiñ kaba khlain da ka jingthmu ban iada ia ka mariang hynrei kaba la ktah pat ia ka jingim bad ka jakpoh jong ki paidbah shuwa ba ka NGT ka dei ban buh da ka rukom tih dewiong da ka bor stad saian ka ban nym ktah ia ka mariang bad kan nym pynduh ia kam ia ki paidbah
Ka jingdkoh trei kam da sorkar Congress UPA ka la wanrah ia ka jingkiew ki marbam mardih,ka petrol diesel man la u snem wat ba ka sorkar Congress ka la synshar la shiphew snem ka la ktah shibun ia ki paidbah khamtam ia kiba duk ba suk,wat ka sorkar ha ka jylla Meghalaya ka la dkoh ki rukom trei kaba nyngeh eh kaba la ktah ia ki paidbah ba duk.
Ka Foreign Direct Invesment (FDI) ka la ktah ia ka jingim ki nongrep bad ka rep ka riang ha ka ri hi baroh kawei,ki paidbah jong ka ri ki dei ban ia snoh kti lang na ka bynta ban pyrshah ia ka FDI namar bun ki jaka kin sa shu duh ei khlem ka jingsiew kaba biang bad ka sa ktah ia ka jingim ki nongrep.
Ka MJCTU ha ka jingialang ba 7 ka rai ba kin phah da ka dorkhas sha u Myntri Rangbah ka jylla u Dr Mukul Sangma bad kiwei de kiba don ha ka bor ban peit ia kine ki jingeh kat kum ka kam kaba ki trei ha kaba ia dei ba ka jingia kren ka mih mynta ka sngi na kane ka jingialang.(SP News)
