Shillong, Lber 05: Ka kong Claudia Lyngwa Deputy Inspector ka tnad pulit ka jylla ba dei peit ia ka Tacitical application police, kala ong ba ki pulit kila kem ia u bah Storgy Lyngdoh dkhot jong ka seng Hynniewtrep National Liberation Council (HNLC).
Haba kren ha ki lat pathai khubor mynta ka sngi ha ophis ba ha khlieduh jong ka tnad pulit la ong ba la kem ia u dkhot ka seng HNLC na iing sah jong u na Mawlynrei Khliehshnong ha ka 2/3/2024.
Haba jubab ia ki jingkylli ka la ong ba kumno yn ngeit ia ka jingthmu pyndem wait jong u bah Strogy namar ba u dei u dkhot ba don bynta ha ka miej jingiakren ia suk bad ka sorkar jylla bad u dang shu leit phai sha Bangladesh da don jingthmu ban pyndem wait lade ban sah noh hapoh jylla.
Ka la ong ruh ba na ka Mobile ba ki laioh ban kurup ki la lap bun ki sakhi ba ki suba ia ka jingdon kti jong u bad ki kam dawa pisa ha poh ka Jylla. kala ong ruh ba ka jingkhang na ka bynta ka jingiakren ia suk bad ka Sorkar Jylla ka dang plie na ka bynta ka HNLC.
Ka la ong ruh ba ka jingkem ia u bah Storgy na ka liang ki pulit kim don eiei ban ong halor ka jingiakren ia suk ka sorkar bad ka HNLC, kane ka dei ka jubab ha ba ia dei bad ki jingkylli.
Kala ong ruh ba kat kum ka jingioh jingtip ba ka jingdon jong ki dkhot ha poh ka HNLC kam duna na ka 30 ngut bad ha ka ba iadei bad ka jingdon ia ki tiar ialeh ka la ong ba kam lah ban tip la ki don ia ki tiar aiu.
Ha ka ba iadei bad ka jingdon ki kyrwoh ba ki don ki kato katne ki ba thmu bam pynkhiem im biang ia ka seng kingatiar ka Garo National Liberation Army (GNLA) ha rilum Garo na ka liang u SP ka North Garo Hill mynta ka sngi ula pyntip ba ki pulit ki la ioh ban kem ia ki Lai ngut.
Na pdeng jong ki kata ia u Sengsang Marak u ba 40 snem ka kyrta, u Teja Sangma ba 40 snem ka kyrta bad u Suresh Sangma ba 32 snem ka rta, ki pulit kila ong ba ki don hynniew ne phra ngut ki ba don jingthmu ban pynkhie im pat ia ka seng GNLA hynrei na ka liang ki bor pulit kin ym map ia ki hynrei kin thwet bad kem ia ki.
U la ong ruh ba u Sengsang Marak u la dei u dkhot ba la don teng mynshwa bad ka GNLA bad kane ka kynhun ka donkti ban dawa pisa na ki briew ha Rilum Garo. La ong ba na ka met jong ki la ioh ban kurup ia ki mobile phone.
