Shillong, Nailur 24: U Myntri Khynnah ka Sorkar Pdeng ba dei khmih ia ka tnat Food Processing Industries u Prahlad Singh Patel uba dei ruh u Myntri ka dei khmih ia ka tnat Jal Shakti u la plié pyrda ia ka North East Summit on Food Processing Opportunities kaba ar sngi ha Shillong, Meghalaya mynta ka sngi.
U Patel mynta ka sngi u la plie ia kane ka Summit ha Indian Institute of Management (IIM) Shillong kaba don ka thong ban kyntiew ia ki jingiatreilang na ka bynta ka jingkiew ki kam shna mar na ki jingthungjingtep.
“Ki ju ong ba haba sdang bha ia kanokano ka kam, kata ka kam ka la kham suk. Ka thong jong u Myntri Rangbah Duh ka ri, u Narendra Modi ka long ym tang ka Look East, hynrei ka Act East’.
Mynta ka sngi nga la leh ia kane ka kam da kaba bud ia kane ka jingthmu da kaba sdang na Meghalaya bad nga la sngewthuh ba ki bun ki lad ki lynti ha kane ka jylla ki bym pat kyntiew haduh mynta,” la ong u Myntri Sorkar Pdeng.
U Patel u la ong ba ka jingjop ka don lai bynta – ka jingtip, ka jingpyniasoh bad ka jingiakren bad ba ki kam kiba iadei bad ka jingshna mar na ki jingthungjingtep ruh ka shong ha kine ki bynta.
U la ong ruh ba haba ka don ka jingpynmih ia unouno u tiar ha ka jaka ba donkam, kane ka lah ban pynlong ia ka kam kaba jop da kaba bynrap ba ka kam shna mar na ki jingthungjingtep ka lah ban pynmih lad ioh kam bad ai jingiohnong ruh ia ka kompani, ka jylla bad ka ri baroh kawei.
“Ka Sorkar India ka la wanrah ia ki skhim ban ai jingkyrshan ia ka jingkit ia ki mar,” u la ong da kaba bynrap ba ka jingeh ka mih haba ym lah ban bataiia ki jingjynjar kiba mih ha ka por ba trei.
“Ngi dei ban iapuson bha halor kane lada ngi kwah ia ka jingjop. Ka jingiakren ka plié lad sha ka jingjop. Baroh ngi don ka bor pyrkhat bad ngi lah ruh ban ialeh pyrshah ia ki jingeh kiba lah ban mih,” la ong u Patel ha ka jingkren jong u ha IIM Shillong.
U Myntri Sorkar Pdeng u la kren ruh shaphang u President barim jong ka India, u Dr APJ Abdul Kalam bam kwai ha dwar u Blei, uba la ai ka jingkren ba khatduh jong u ha IIM Shillong.
U dkhot ka Board of Governors IIM Shillong, Atul Kulkarni pat u la ong ba ha ka thain shatei lam mihngi, ki don tang 60,000 tylli ki kam kiba la pynrung kyrteng kum ki MSME kaba long tang 0.7 % jong ki kam kiba la pynrung kyrteng kumne ha kylleng ka ri. U la ong ruh ba bun ki briew kim tip shaphang ki skhim jong ka Sorkar.
U la batai katto katne shaphang ki jingeh jong ki briew ba seng kam lajong ha kane ka thain da kaba ong ba ka jingduna jong ka jingkyrshan bad ka jingwad bniah ki dei kiwei kiwei kaba ka Tnat Sorkar ka lah ban pynbeit.
U la ong ruh ba ka jingduna ha ki jingdon jingem bad ka jingduna ha ka jingkyrshan pisa ka la ktah bha ia ka thain watla ka dei kaba don shibun ki lad ki lynti.
U Kulkarni u la ong ba ki briew ka thain ki sngewthuhkumno ban trei ia ki kam lajong bad ba kane ka dei kaeikaei kaba lah ban kyntiew khnang ba ka kamai jong ki nongrep bad ki lad ioh kam ki kham bha.
Ha kane ka prokram, katto katne ngut ki nongseng kam lajong ki la ai jingkren shaphang ki kam jong ki bad ki jingeh ba ki iakynduh bad napdeng jong kine ki long ka nongshet wine na Arunachal ka Tage Rita bad ka trai ka Meira Foods jong ka Manipur, ka Shubra Devi.
U Director ka IIM Shillong, Prof. DP Goyal, ki dkhot ka North East Council, Khadi Gram Udyog, ki riewshemphang, ki nongseng kam lajong bad ki nongmihkhmat na ki kam bapher bapher ki la iashim bynta ha kane ka prokram mynta ka sngi.
Ha ka sngi ba ar, yn don ki jingai jinghikai teknikal ha kaba ki riewshemphang bapher bapher kin ai jingkren. Kane ka Summit ka thmu ban kyntiew ia ki jingiatreilang na ka bynta ka jingkyntiew ia ki kam shna mar na ki jingthungjingtep ha kane ka thain.
