Shillong, Kyllalengkot 05: Ki nongtrei jong ka Meghalaya Transport Corporation (MTC) kiba la pynlong ia ka jingiakhih kaba khlem buh por mynta ka sngi kila weng noh ia kane ka jingiakhih jong ki ha dien ba ki bor ba dei peit ia ka MTC kila kular ban siew noh ia ka tulop bas ah lai bnai ka jong ki.
Ia kane ka rai la shim ha ka jingialang kaba la khot da ka Managing Director jong ka MTC ka kong A Nikhla bad ki nongialam jong ka seng Meghalaya Transport Corporation Workers’ Union (MTCWU) kaba la long mynta ka sngi. Ka jingtrei kam jong ka MTC kala ktah lut mynta ka sngi namar baroh ki jaka die tiket kila khang.
Haba kren ha ki nongthoh khubor ha dien ba la kut ka jingialang bad ka management u general secretary ka seng K Rumnong, u la ong ba kila weng noh shipor ia ka jingiakhih ka jong ki ban ai lad ia ki bor ba pyniaid ia ka MTC ba kin leh ia kaba don kam ban pynbeit ia ka jingeh ka jong ki nongtrei, ha kane ka jingialang ka MD kala ong ba ka sorkar kala klumar ban pynlait pisa sa T.90 lak tyngka na ka bynta ka tulop jong ki.
Ha kane ka jingiakren mynta ka sngi ka MD ka kong Nikhla , kala kular ba kan sa phah sha ka sorkar da ka jingthoh ban ban pynlait noh ia ka tulop kaba dang sah lai bnai. U Bah Rumnong u la ong b aka tulop jong baroh ki nongtrei ka MTC ha ka shibnai ka poi sha ka T.70 lak tyngka.
Ha u bnai Nohprah jong u snem 2016 ka sorkar kala pynlait ar bnai, ha kane ka jingiakren la ong ba ki bor ba dei peit ia ka MTC kin ia leh katba lah ban pynioh ia ka tulop jong ki man u bnai, ki nongtrei jong ka MTC kila sdang ban trei kam biang naduh mynta ka sngi por saw baje jan miet.
