Shillong, Jymmang 15: Ka jingai jingbit jong ka Jaintia Hills Autonomous District Council (JHADC) ia ki trai khlaw ba kin pom ia ki dieng na ki khlaw jong ki katkum ka Working plan kala kut ha ka 31 tarik u Lber mynta u snem, hynrei kumba la ioh jingkhein antad da ka tand khlaw la ong ba ka dang sah kut kumba 5000 cubic meter ka dieng kaba la dep ban pom.
Katkum ki thymmei khubor kiba la ioh da u SP News Agency, la ong ba ka Executive Committee kaba la ialam da u Bah Thombor Shiwat kum u Chief Executive Member kan sa shong pyrkhat ia kane ka kam ha ka 18 tarik mynta u bnai ban ia kren la kin khang noh syndon ne kin dang pynlait ban kit ia ki dieng kiba la dep ban pom kida dang sah ha khlaw.
Na ka liang jong ki trai khlaw kila leit ban kyrpad ia ki bor jong ka JHADC ba kin ailad sa tang ar lane lai bnai ban ioh kit pynlut ia ki dieng kiba la dep ban pom kiba dang sah ha khlaw ia kiba ym pat lah ban sei lut. Katkum ka jingkhein kaba la ioh da ka tei ka ophis la ong ba ka dieng kaba la dep pom ia kaba ym pat kit kiba dang sah ha khlaw ka long kumba 5000 cubic meter.
Lah ban pynkynmaw ba ha dien ba la khang pom dieng ha u snem 1996, ka sorkar kala thaw ia ka High Level Committee bad la bethah ia ki District Council ha ka jylla ba kin don ia ki working plan, khnang ba ki trai jaka kin ioh ban pom ia ki dieng kiba la heh katkum ki kyndon kiba la buh dei halor kane ka nongrim ba ka JHADC kala shna ia ka Working plan bad ai jingbit shipor ia ki trai jaka ba kin ioh ban pom dieng ia kaba la kut ha ka 31 tarik jong u Lber mynta u snem 2017.
