Shillong, Jylliew 07: Ki shipai BSF kiba la peitngor bha ha ka por shiteng miet kila kila ioh ban bat 11 ngut ki nong India bad 11 tylli ki kali kiba la kit shini ban shallan sha Bangladesh ha Muktapur, baroh u shini bala ioh kurup la kot sha 11000 kilo.
Kine ki kali kiba la ioh ban kurup ki dei kiba la wan hiar na Amlarem bad haba ki BSF kila kylli kine ki 11 ngut kim shym la lah ban pyni ia ki kot ki sla kiba biang ban pynshisha ba ka jingkhaii kan long hapoh Ri India.
Na ka liang jong ki BSF kila aiti ia kine ki kali bad ia ki briew bad u shini sha ki Kostom kiba don ha Dawki ba kin pynlong ia ka jingtohkit bad ban leh ia kaba don kam katkum ki kyndon ain ia kine ki nongkhaii beain.
Naduh u bnai Risaw 2022 haduh mynta ki BSF kila ioh ban kurup haduh lai lak kilo u shini bala thmu ban shallan sha Bangladesh, ka jingdawa shini ha Bangladesh ka jur bha namar ka jingkiewdor jong ka shini ha kathi ka Ri long ong ki BSF.
