Nongpoh, Nailar 14: Ka Independence Day Run ba la pynlong da ka ophis u District Sports Officer (DSO), Ri-Bhoi district bad ka Deputy Comissioner (DC) ka district, kaba la sdang naduh ka 9 tarik bad haduh hynnin ka sngi.
Hynne ka step, ia kane ka tamasa mareh marathon, la pynlong ha Umsning C & RD Block kaba la sdang naduh ka por 7 baje mynstep bad kaba ka jaka ba la long ka long na madan lehkai ka Nongjri, Umsning sha Sohpdok bad wanphai biang sha katei ka madan.
Ia katei ka jingmareh ban rakhe ia ka jinglaitluid ka ri India, la plie hynne ka step da u Bah P Khonglah, Block Development Officer (BDO) ka Umsning C & RD Block, da kaba u la kaweh ia ka lama kum ka dak ba la plie bad ailad ia ki samla kiba shim bynta ban iakhun ia katei ka jingmareh kaba 10 kilomitar.
La sakhi lang ha kane ka jingplie ia katei ka jingmareh da ka jingdon lang u District Sports Officer (DSO) ka district, u Bah P.M Marbañiang lem bad ki nongtrei ka ophis jong u bad kiwei kiwei ki riew rangbah.
Ha kane ka jingmareh, na ka liang ki shynrang, u Albert Diengdoh na Nongsder, Umiam, u la long u lahduh, katba uba wan ba ar ka leit sha u Teibor Marwein, Nongsder, Umiam, bad uba lai ka leit sha u Nickywell Nongkseh, Nongjri, Umsning.
Ka nam ki nongshim bynta ba khynnah tam ka leit sha u Mewansiewdor Lymba, Umsaitsning bad u nongshim bynta ba la rangbah tam ka leit sha u Shaphrang Turnia, Sohliya, Umsning.
Na ka liang ki kynthei, ka Ibadahun Shisha Malieh, Nongjri ka la long ka lahduh, ba ar ka leit sha ka Tumeris Mawlong, Lawpyllun, Umsning bad ba lai ka leit sha ka Ribanylla Nongsiej, Nongjri.
Ka nongshim bynta ba la rangbah ka leit sha ka Rijoplang Ryntong bad kaba khynnah tam ka leit sha ka Joelinda Nongrum.
Baroh ki nongshim bynta ha Umsning ha kane ka Independence Day Run ki la wan palat ia ka 200 ngut bad dei ruh na ka jinglong ka mariang kaba dum bad hap slap ka la pynthut khyndiat ia ka jingwan shim bynta jong ki samla ha katei ka lympung.
Haba phai pat sha ki lympung kiba la dep long, ha Jirang Block bad Umling Block, kata ha ka 9 tarik bad ha ka 12 tarik mynstep, ha Jirang na ka liang ki shynrang ka nam lahduh ka leit sha u Ridor Sohkhwai, na Umkynsir, bad Umling Block sha u Bansienglang
Marngar, ha Jirang ba ar ka leit sha u Romius Pariong, St Peter School
bad ha Umling sha u Shanbok Kongor, Pahampdem, ha Jirang ba lai sha u
Request Thangkhiewm Wahsynon bad ha Umling sha u Ioanis Maring, St
Paul School.
Na ka liang ki kynthei pat, ha Jirang ka nam lahduh ka leit sha ka Konita Wahlang, Wahsynon bad ha Umling sha ka Senabi Syngkli, Lumdieng. Ha Jirang ba ar ka leit sha ka Saiti Sohkhwai, St Peter School bad ha Umling sha ka Shidalin Lyngdoh, Nongkhrah bad ka nam ba lai ha Jirang ka leit sha ka Elizabeth Mawiong, St Peter School
bad ha Umling sha ka Phiralin Nongrum, Nongkhrah.
Ki nongshim bynta ba khynnah tam ha Jirang ym don bad ha Umling ka Sandra Tham bad ka nongshim bynta ba rangbah tam ha Jirang ka leit sha ka Riphiew Rani bad ha Umling sha ka Daiana Nongrum.
Ia ka jingplie ia katei ka tamasa ha Jirang Block la plie bad kaweh lama da u Bah G.H Passah, BDO ka Jirang C & RD Block bad ki nongshim bynta kiba la poi ha katei ka lympung kaba la long ha Patharkhmah ki long 470 ngut kynthup kynthei bad shynrang,.
Katba ha Umling Block, la plie bad kaweh lama da ka Dr Pooja Pandey, DC ka district
bad baroh haba kheiñ kyllum lang kynthei bad shynrang ki nongshim bynta ki long 453 ngut.(SP News)
