Shillong, Jymmang 07: U myntri rangbah duh jong ka Ri India u Narendra Modi, haba kren lyngba ka Video Conferencing ia ka jingrakhe jong ka jingdap shipsah snem jong ka seng Bharat Sevashram Sangha ia kaba la pynlong ha Shillong, u la ong ba u kwah ban iohi ba ka North East kan long ka khyrdop sha ki Ri jong ka South East Asia.
U myntri rangbah duh jong ka Ri u la pynkynmaw ha kaba u dang ia trei lang bad ka Bharat Sevashram Sangha ha Gujarat u ong ba kane ka seng ka don ia ka mynsiem ban ai ka jingshakri bad ha ka juh ka por ka hikai ruh ia ka mynsiem trei shitom khlem da salia ban trei ia kano kano ka kam.
U la ong ba kane ka seng kala trei shitom ha kane ka dong shatei lam mih ngi jong ka Ri India ban iarap ia ki briew ha kaba ki ngat ha ka jingshah lynshop ha ka mariang bad ka jingtrei ban iarap ia kiba duk bad kiba rangli kala pynurlong ia kaei kaba la thoh ha ka kitab. La ong ba u Swami Pranavananda u nongseng ia kane ka kynhun shispah snem mynshuwa u la kren ia ka hok jong ki paidbah bad u la seng ia kane ka kynhun ban trei na ka bynta kane ka thong.
U myntri rangbah duh jong ka Ri u la kyntu ia ka BSS ba kin trei na ka bynta ban wanrah ia ka khuid ka suba khamtam eh ha kane ka dong shatei lam mih ngi jong ka Ri India, bad ka dei ban peit, kumba u angnud ban ioh ba ka dang shatei lam mih ngi jong ka Ri India kan long ka khyrdop sha ki Ri jong ka South East Asia.
Ha kane ka jingkren jong u myntri rangbah duh jong ka Ri, la ai ka jingkren pdiang burom da u General Secretary ka seng Bharat Sevashram Sangha, u Sreemat Swami Biswatmananda ji Maharaj, ha kaba u la kren ia ka jinglong ba kynja mynsiem jong ka Ri India. Ia ka jingkren ai khublei pynkut la kren da u Sreemant Swami Ambareeshananda ji Maharaj, u ba la trei bad u myntri rangbahduh jong ka Ri ha Gujarat.
