Shillong, Lber 27: Ha ka jingkanbas ilekshon mynta ka sngi ha Jadi ha South Garo Hills na ka bynta ka kyrtong jong ka NPP ka Agatha K Sangma u myntri rangbah ka jylla u Conrad K Sangma u la kynnoh ba ka sorkar jong u Dr Mukul Sangma kam shym la leh ei ei ha kaba ia dei bad ka jingshah khang tih dewiong kaba la ktah ia ka jylla baroh kawei.
U Myntri rangbah ka jylla u la ong ba u Dr Mukul ym shym la lah ban ia khun pyrshah ia ka hukum jong ka National Green Tribunal (NGT) kaba la wanrah ka jingeh ia ki briew kiba im na ka kam tih dewiong. La ong ba ka jingkhang tih dewiong kala ktah ia ka kamai kajih ym tang ia ki ba trei ha kane ka kam hynrei kala wanrah ruh ka jingduh ia ka jylla.
Ha u snem 2014 la khang ia ka jingtih dewiong, ka jingkylli kaba la buh da u myntri rangbah ka jylla ia u Dr Mukul Sangma myntri rangbah barim jong ka jylla ba balei ym shym la ujor ia ka hukum jong ka NGT sha Supreme Court. Dei tang ha u snem 2018 haba ka sorkar MDA kala wan ha ka bor ba kila sdang ban khylli naduh bas dang ia kane ka kam khang tih dewiong na ka bynta ka jingmyntoi ki paidbah, la ong u Conrad ha ka jingkanbas ilekshon ha Jadi ha South Garo Hills.
Ha kane ka jingkanbas ilekshon u myntri rangbah ka jylla u la ong ba ka NPP ha dien ba kala wan ha ka bor, la ong ba ha u snem 2015 ka sorkar pdeng kala pan ia ka jingpynshai ban pynlait ia ka jingtih dewiong ha kane ka jylla na ka Mine and Mineral (Development and Regulation) Act ka sorkar kaba rim kam shym la ai jubab.
U Myntri rangbah u la kynnoh ha kane ka sngi ba u Dr Mukul u don la ka jong ka jingthmu ha kaba ia dei bad kane ka kam tih dewiong, ym don jingpyrwa ei ei ruh na ka bynta ki paidbah. Ha u snem 2016 ka tnad sorkar pdeng ba dei peit ia ka kam dewiong kala trei la ka kam ban pynlait ia ka jylla Meghalaya na ka MMDR Act bad ia kane la ai ruh ia ka jingmynjur da ka tnad kampoh iing jong ka sorkar pdeng hynrei ka sorkar u Dr Mukul ha kato kapor kam shym la jubab bad ka jingkylli kaba la buh da u Conrad ka long balei ka sorkar u Dr Mukul kam shym la leh ei ei na ka bynta ki paidbah.
U Conrad u la ong ba lada u Dr Mukul u don kata ka jingsngewkhia na ka bynta ki paidbah ia kane ka jingeh la dei ban lah ban pynbeit, hynrei mynta ka Congress ka sdang ban pynmih ia ki Video pyrshah ia ka party NPP ban wanrah ia ka jingklumar jingmut ha ki paidbah ban ong ba ka NPP kam shym la lah ban pynbeit ia kane ka jingeh ha kaba ia dei bad ka kam khang tih dewiong.
Ha kane ka jingilang u myntri rangbah ka jylla u la ong ba ka NPP ka trei shitom ban pynlait ia ka jingtih dewiong, da kaba sumar ia ka mariang bad ka jingshngiang jong ki nongtrei bylla tihdewiong, la ong u Conrad K Sangma myntri rangbah ka jylla.
