Shillong, Lber 15: Ka seng Hynñiewtrep Integrated Territorial Organization (HITO) hapoh ka jingialam jong u bah Donbok Dkhar mynta ka sngi kila leit ban ia kynduh ia umyntri rangbah ka jylla u Conrad K Sangma, ha kaba kila ai da ka jingthoh ban kyntu ia ka sorkar ban pynjlan ia ka rta wat kam hapoh ka tnad pulit sha ka 37 snem ka rta.
Ha ka jingthoh kaba la ai sha u myntri rangbah la ong ba la pynjlan ia ka rta thungkam ka 27 snem haduh 32 snem bad ia ki riewlum la pynjlan haduh ka 37 snem ka rta kumba la leh ha kiwei ki tnad sorkar jong ka jylla Meghalaya namar kane ka jingkhot rung kam ka long ka jingmyntoi iaki khun samla.
Ha kane ka jingiakynduh na ka liang jong ka seng kala ai khublei kyrpang ia ka sorkar kaba la lah ioh ban kem ia ki nonglehkam sniew ha kine ki sngi kiba la dep, halor ki jingjia kiba ym sngewtynnad, ka seng ka pynpaw ia ka jingsngewnguh ia ka sorkar halor kane.
Katkum ka jingpynbna ka sorkar kaba la pynmih ha ka 6 Lber 2024 na ka ophis jong u Inspector General ki Police ba dei ruh u shnongknor jong ka Central recruitment board, ka sorkar Meghalaya kala kren shai ba ki don kiba kiba lait haduh 2968 tylli ha ka tnad pulit ha ki kyrdan bapher bapher.
Ha ka kyrdan UB Sub Inspector 76 tylli, Unarmed Branch Constable 720 tylli, Fireman 195 tylli, Driver Fireman 53, Makhanik 26, MPRO Operator 205, Signal Bn Operator 56, ha ka armed branch constables, battalion constables, MPRO GD bad constable handyman 1494 tylli bad Draibar constable 143 tylli.
