Shillong, Jymmang 22: Mynta ka sngi ka seng HYC kala leit ban ia kynduh ia u Director ka North-Eastern Indira Gandhi Regional Institute of Health and Medical Sciences (NEIGRIHMS) bad ha kane ka jingiakynduh kila ai ia ka jingthoh ban dawa ba dei ban pynbun ia ka bhah pule doktor na ka bynta ka jylla Meghalaya.
Ha kane ka jingthoh ka HYC kala kdew shai ba ka jaka puler doktor hapoh NEIHRIHMS kalah ban pdiang tang 50 ngut ki samla pule, na ka jylla Meghalaya kin pdiang tang 14 ngut ki samla pule, na ka jylla Nagaland kin pdiang 10 ngut, bad 18 ngut kan long kyllum lang ia kiwei ki jylla ka thain shatei lam mih ngi kynthup ia ka Sikkim.
Ka seng HYC kala kdew ba ka jylla Nagaland kala don la ka jong ka jaka pule Doctor , kumta la dei ban pynkiew ia ka bhah na ka bynta ka jylla Meghalaya, ha kane ka snem sdang jong ka jingpule mynta u snem 2024-2025.
Haba ia dei bad ka jingpule nurse, kane ka hospital ka lah ban pdiang 10 ngut ki samla pule ha ka kyrdan M.Sc Nursing bad 50 ngut ha ka kyrdan pule B.Ss Nursing, hynrei kaba phylla ka long ba ha kane ka jingpule kam don ka jingmang bhah ia ki samla pule na ka jylla Meghalaya. Ka HYC kala dawa ba dei ban mang noh ia ka bhah na ka bynta ka jylla khlem da shim na ka eksam NEET.
Haba ia dei bad ka jingkhot ban thung kam ka HYC kala ong ba ka NEIGRIHMS kala dei ban weng ia ki katto katne ki kyndon na ka bynta ki samla kane ka jylla namar kila trei slem ha ka kam ki dei ban shah ia ki ban apply namar wat ka AIIMS Delhi ruh ka khlem bud ia ki kyndon haduh katta katta.
Ha kane ka jingthoh la kdew ruh ba namar ka NEIGRIHMS ka hap hapoh ka jingpeit jong ka KHADC, baroh ki kam khaii pateng dei ban bud ia ki kyndon jong ka KHADC ha kaba ki don kam ia ka Trading License, kane ka jaka ai jingsumar ka long ban ai jingiarap ia ki briew ka jylla Meghalaya bad ka thain shatei lam mih ngi baroh kawei.
Ha kane ka jingthoh kaba la phah la ong a dang shen ka NEIGRIHMS kala thung kam nurse hapdeng 40 haduh 50 ngut lyngba ka NORCET, hynrei kim pat wan shimti ia ka kam ban trei haduh mynta bad don ruh kiba la resign noh, ha kum kane ka khep dei ban thang ia ki Nurse kiba dei na kane ka jylla dawa ka HYC.
