Shillong, Jylliew 13: Ka Khasi Students’ Union (KSU) Central Executive Council lyngba kane ka kyrwoh ka pynrem jur ia ka jingthwet khlem pud ki bor pulit ia ki dkhot ka seng na sor Shillong bad Ri-Bhoi district. Kane ka jingleh jong ki pulit ka long kaba khlem akor bad kaba shu thom bein ia ki dkhot ka seng namar khlem da biang ki sabut kiba biang ki shu leit ban khyra kulmar ia ki iing ki seng jong ki dkhot ka seng.
Shuh shuh ka rukom thwet ka long kumba ki khein ia ki dkhot ka seng kum ki lehnoh bad ym shuh kum ki samla pule namar ka jingwan ka jong ki ka long kyndit kyndit ha ka por shiteng synnia ha ka por ba baroh ka shnong ka thaw ka dang ioh thiah. Ka jingwan jong ki bor pulit ha ka por shiteng miet ka la pynher syrngiew ia kiba bun ki ba haiing ha sem jong ki dkhot khamtam ia ki khyllung ki khynnah.
Ka jingleit khynra jong ki pulit ia ki dkhot jong ka seng ka long kaba be-ain namar ki la iaid lait ia ki bor shnong kiba dei shi bynta ban peit ia ka suk ka sain jong ka shnong ka thaw. Ka jingiaid lait jong ki bor pulit ia ki bor shnong ka pyni ba ki pulit kim don jingkhein snep khyndiat ruh ia ki ia ki riti shynshar shnong jong ki paid Khasi Khara.
Ka seng sa shisien ka pynpaw beit ia ka jingpyrshah ia ka jingthmu ka sorkar pdeng ia ka lynti rel ha ka jylla namar ha u snem 2011 ka sorkar jylla hi ka la kular ba kan ym pat ai lad ia ka North East Frontier Railway ba kan sdang ia ka jingshna ia ka lynti rel tad haduh ba ki ain kiba khlain ki ban teh lakam ia ka jingwan rung kyrthep ki briew ba na shabar ha ka jylla ka jong ngi.
Katkum ka jingioh jingtip jong ka seng halor ka lynti rel ha Mendipathar ha North Garo Hills, la shem ba kane ka jaka ka dei kaba la shah buhai shnong lypa ha ki bar jylla bad ha ki mynder ri kumta ka jingwan jong ka lynti rel hangne ka long tang ban iarap ia ki briew nabar ba kin buhai shnong shuh shuh ha kane ka thain. Nalor kata ka seng ka la ioh jingtip ruh ba wat ki briew kiba na bar kiba i khyllah ha ka rukom iaid rukom ieng jong ki ki ju rung ju mih na ka por sha ka por ha North Garo Hills lyngba ka rel.
Ym tip aiu kine ki briew ki donkam ha North Garo Hills hynrei kine ki briew kim ju wan ha ki por mynshwa haba ym pat don lynti rel. Ka seng ka ioh jingtip ruh ba ka sorkar kmie ka kular ia ki paid Garo ba kane ka lynti rel kan iaid beit tang ka rel kit mar hynrei hadien ka shet kylla ha kaba ka la pyniaid ruh ia ki rel kit briew. Ka seng ka kyntu ia ki paidbah ka Bri U Hynniewtrep ba kin kyrshan met bad mynsiem ia ka jingialeh jong ka seng khnang ba ki pateng ki ban dang wan kin ioh ia ka lawei kaba phyrnai bad kin mad ia ka jinglong trai ha la ka Khyndew ka shyiap.
Ka seng wat lada ka sorkar ka thombor katno katno ruh ia ki dkhot da kaba bom lathi lane kem ia ki, hynrei ki dkhot jong ka seng kin ym kynran dien ha ka jingtieng. Pynban ki dkhot ka seng kin iai ieng ha ka nongrim ban trei bad ban iakhun na ka bynta ka bha ka miat jong ki khun ka Bri U Hynniewtrep, ong u samla Donald V. Thabah, general secretary jong ka seng KSU ha ka kyrwoh.
