Shillong, Lber 23: U Director General ki Pulit ka jylla Meghalaya u Dr. L.R Bishnoi mynta ka ngi u la ong ba ki pulit ka jylla kila ioh ia ka jingtip ba bun ki riew paidbah kila ioh ia ka shithi dawa pisa na seng lehnoh Hynniewtrep National Liberation Council (HNLC) bad na ka Garo National Liberation Army (GNLA) lyngba ki social media bad ki WhatsAp, Telegram bad SMS.
Na ka liang jong ka tnad pulit kala ong ba don kam ban sngewthuh ban kyrshan da kaba ai pisa ia ki seng kiba la shah niew beain ha ka sorkar ka dei ka kam sniew ha khmat ka ain, kum kata ka jingiarap ka long pyrshah ia la ri bad ka buh ia ka jingim jong ki paidbah kiba lui lui ha ka jingma.
Ka jingkyrshan pisa ia ki kynhun bala shah niew beain kam dei tang ba la pynkhien ia ki kyndon ain bad ka dei ka jingkhien dewthala ha ka jingiakhun pyrshah ia ki kam lehnoh bad ia ki kam beain jong ki.
Halor katei ka jingpynshai paidbah na ka liang jong ka tnad pulit ka kyntu ia ki paidbah ban kiar na ka jingsiew pisa sha ki seng lehnoh namar kin ngat ha ki kyndon jong ka ain kaba 11,13 bad 17 jong ka Unlawful Activities (Prevention) Act, 1967, kum juh hapoh ka kyndon kaba 4 jong ka ain Unlawful Activities (Prevention) Act, 1967 bad ka kyndon 109 jong ka IPC.
La bthah ia ki paidbah ba lada ki ioh ia ki jingshah dawa pisa dei ban pyntip mardor sha ki pulit ba leh ia kaba don kam ha kaba ki pulit kin nym iathuh ia ka kyrteng jong kiba shah dawa pisa la ong DGP jong ka jylla Meghalaya.
