Jowai, Naiwieng 16: Ka Jaintia Students’ Union (JSU) seng kmie ha ka jingpyllait khubor mynta ka sngi ka pynpaw iaka jingsngewkhia halorka jingkhap ngiah bad ka jingia tyngian palat ki paitbah haba ienglain haki bank ban shim ne sei pisa ne ha kaban kylliang iaki pisa.
Shuh shuh ka JSU kala ioh ruh ban sakhi iaka jingjia haki ktto katne ki bank ha kaba ki piadbah kiba ienglain ki poi shaduh u pud ban ia tim ia tla ne ban ia pyninia iwei a iwei pat namar ka jingiaknieh lain lane namar ka jingia tyngngian. Kane ka lah ruh ban wamlam wat shaka jingia mynsaw naka jingia kynad lane daka jingthaid ban ap ha u lain.
Kumta halor kine ki jingeh, na ka liang ka nongialam jong ka JSU kila lap ba kane baroh ki kynrum kynram lane ki jingia khajia ki mih namar ba ki paidbah ki hap beit ban ieng hala u jong u lain bad kim ioh satia ban mih shabar jongu lain shisien baki la ieng. Bad lada ki mih shabar u lain kin shah knieh noh ha kiwei pat.
Kumta ka seng da kaba sngewkhia ia kane ka jingeh jong ki paidbah ka la kyntu bad ai jingmut iaki bor pyniaid jongki Bank bapher bapher hapoh ka Ri lum Jaintia ban ai lane sam noh daka Token Number ia kino kino ki briew kiba kwah ban shim lane buh pisa, khnang ba ki paidbah kin ym donkam ban ieng lain sah hajuh daki bun bun kynta, hynrei ban sngap beit iaka jingkhot ia u serial No. bad lada leh kumne ki paidbah kin suk bad kin ioh ban pyndep ia kiwei pat ki kam.
Ha kajuh ka por ka JSU ka kyntu ruh iaki nongpyniaid iaki bank, ban buh ia ki briew ha kaban khot ia U serial No. lane u token No. jongki paidbah, bad ha kajuh ka por kalong kaba bha shuh shuh lada ki Bank ki pyndonkam daki Kor pynsawa ha kaban khot ia u token Number.
