Mairang, Naitung 18: U Bah PN Syiem Chief Executive Member (CEM) jong ka KHADC, u long ha ka jingialang paidbah ha Mairang ha ka sngi ba rakhe ia ka sngi iap kaba 181 jong u Syiem ba khraw jong ka Hima Nongkhlaw u Tirot Sing Syiem, “ Lada phi don ha kano kano ka shuki kaba phi trei to pyndon kam ia ka iktiar jong phi ban iada ia ka jaidbynriew.
Haba kren ha kane ka jingialang paidbah kaba la pynlong da ka Hima nongkhlaw kum u nongsan, u la ong ba kam myntoi ka tulop, kam myntoi ka bai bam tynmen lada kam don ia ka lawei jong ka jaidbynriew, kane ka jingrakhe ia ka sngi iap jong une u syiem ba khraw jong ka Hima Nongkhlaw to kan kyrsiew thiah ia kiba bun ki samla ban mih ki Turot Sing ha kane ka por kaba mynta.
La ong ba 181 snem mynshuwa haba u Tirot Sing u hap ban shah pyniap ha ka kti jong ki phareng ha byndi ha poh Dhaka kaba mynta kala hap hapoh jong ka Ri Bangladesh, u sngewtuh ia ka jingkor dor jong ka jinglaitluid bad khlem da pyndem ha ki bor nongwei namar ka jingeieit iala ka jong ka jaidbynriew.
U la ong ba kam myntoi ban long MLA, ban long MDC, ban long minister bad ban long Chief minister la day m lah ban iada ia ka jaidbynriew, la ong ba ha ka snem 1952 ba ioh ia ka District Council kalong ban iada ia ka jaidbynriew, ka jingioh ia ka jylla ba pura ha u snem 1972 kala dei ban dang pynkhlain shuh shuh ia ka jaidbynriew. Hynrei kaba sngewsih ka long ba ka jaidbynriew mynta ka ia kynduh shibun ki jingeh.
Ka daw ka long la ka dei na ka District Council lane ka sorkar jylla bay m shym la shna ia kita ki ain ban iada ia ka jaidbynriew, la ka long ha ka khyndew ka shyiap, ka dei ban khlain ka dorbar Hima, ka dorbar shnong bad ka dorbar kur. Na ka liang jong ka District Council mynta kala ialeh katba lah ban iada ia ka jaidbynriew.Ha kane ka sngi na ka liang jong u CEM u la pynbna ban ai shiphew lak na ka KHADC ban pynbha ia ka Madan.
Ha kane ka sngi kila don bun ruh kiwei kinongkren kiba la kren halor kane ka phang ba ia dei bad kane ka sngi rakhe ia ka jingdap 181 snem jong ka jingiap jong u Syiem ka hima Nongkhaw u Tirot Sing Syiem, na ka liang jong ka kur ha ka jingkren jong u Bah Donal Syiemlieh u la ong ba ka jaid jong u Tirot Sing Syiem kaba la iathoh da baroh ki dei ban thoh Syiemlieh.
Ha kane ka sngi kala don ruh ka jingsam khusnam ia kiba la wan ban ia shim bynta kila don ki jingrwai tynrai bad ki jingshad tynrai ia kiba la pynkhreh da ka Hima Nongkhlaw ban pynphuh pynphing ia kane ka sngi kaba khraw.
