Shillong, Naitung 04: U General Secretary jong ka AICC ba dei peit ia ka jylla Meghalaya u Dr CP Joshi u la poi mynta ka sngi ha kane ka nongbah Shillong bad ka jingiakynduh ia ki nongkit kam jong ka seng Congress ha kane ka jylla kan long la shai ka sngi hapoh jong ka Congress Bhavan.
Une u heh jong ka AICC yn sdang ban ia kynduh ia ki nongialam jong ka seng Congress ha kane ka jylla naduh ka por khatwei baje mynstep bad un leit phai pat sha Guwahati ha ka por san baje jan miet, ki lad khubor kiba ia jan bad ka seng Congress la ong ba kan nym don kano kano ka jingiakynduh para marwei ia ki MLA jong ka party.
Ki thymmei khubor ki iathuh ba ka jingwan ka jong u sha kane ka nongbah Shillong ka long ban twad jingmut na ki nongkitkam jong ka party bad kumno ba kin ia pynkhreh na ka bynta ka election ka ban long ha u snem 2018 sha ka iing dorbar thawain ka jylla.
