Shillong, Rymphang 22: U Chief Executive Member (CEM) jong ka Khasi Hills Autonomous District Council (KHADC u Bah PN Syiem mynta ka sngi u la wanrah ia ka resolution hapoh ka iing dorbar ban pyndam noh ia ka Memorandum of Understanding (MoU) kaba la ia soi hapdeng ka District Council bad ka Uranium Corporation Limited (UCIL) bad ia ka No Objection Certificate (NOC) bad la ai sha ka tei ka juh ka company da ka EC ba mynshuwa ruh la pyndam lang.
Haba wanrah ia kane ka resolution hapoh ka iing dorbar na ka liang jong u CEM u la ong ba ia kane ka kam la ia kren bniah ha ka Zero Hours bad dei halor jong kane ka EC kala wanrah ia kane ka resolution ban pyndam noh ia kane ka MoU kaba la ai jingbit ia ka UCIL ban shna surok na Wahkaji sha Mawthabah bad ia ka NOC bala ai ban tih ia u Uranium ruh la pyndam yn pyndam noh lada ka iing ka pdiang.
Kiwei ki dkhot jong ka iing dorbar kiba la ia shim bynta ha ka jingiakren ki long u Bah PT Sawkmie, Bah M Nongrem, Bah P Syiem bad u Bah HS Shylla bad ha dien ba la ia kren bniah la buh ia kane ka mat hapoh jong ka iing ban shim ia ka rai ka iing dorbar ka la pdiang da kaba pynkylla khyndait ia kane kaba la wanrah da ka EC.
Ka iing dorbar kala pdiang ban pyndon kam ia ka MoU kaba la ia soi bad ka UCIL ban shna ia ka surok na Wahkaji sha Mawthabah bad ia ka NOC ba la ai ban khlaw ia u tei u marpoh khyndew ruh la pyndam noh, halor kane ka iing dorbar kan thung ia ka kynhun tohkit kaba laitluid ban tohkit ia ka jingbei pisa ka UCIL sha ka KHADC ha kaba shna ia katei ka surok.
Ka jingpynkylla ha katei ka resolution kaba la wanrah da ka EC ka long ba nangne sha khmat ha kaba ia dei bad ka mat Uranium, yn nym lah ban raid a ka Executive Committee khlem da ioh jingbit shuwa na ka iing dorbar.
