Shillong, August 19: Ki 358 ngut ki shipai kiba la shah hikai kyrpang hapoh jong ka Assam Regimental Centre Shillong kila pyndep mynta ka sngi ia ka jingshah hikai ka jong ki ia kaba la pynrung ha ki kam shipai mynta ka sngi da ka jingiaid kilan met. Kane ka dei ka kynhun kaba 318 kaba la pyndep ia kane ka jingshah hikai ha kane ka kynhun shipai.
Ia kane ka jingiaid kilan met la peit bniah da u Brigadier Sudhir Kumar Jha, YSM, Commandant, Assam Regimental Centre. Ha kane ka sngi la sakhi lang da ki kmie ki kpa jong kine ki shipai kiba la pynrung thymmai bad kiba ha iing ha sem jong ki lem bad ki heh shipai la ia don lang ha kane ka sngi.
Ha ka jingkren jong u Brigadier Sudhir u la kyntu ia kine ki shipai kiba la pynrung mynta ka sngi ba kin bat ia ka burom bad ka nam jong kane ka kynhun shipai khlem da riej ban iada ia la ka jong ka Ri bad u la ong ba ki rang samla kiba don ha ki kam shipai kiba na kane ka dong shatei lam mih ngi jong ka Ri India ki long shisha kiba shlur.
