Shillong, Naiwieng 18: Ka tnad District Council Affair department jong ka sorkar jylla mynta ka sngi kala pynmih ia ka hukum ba la pyntrei kam ia ka “Model Code of Conduct” naka bynta kane ka election shaiteng samaoi sha ki ar tylli ki District Council, ka Khasi Hills Autonomous District Council bad Jaintia Hills Autonomous District Council. Ka DCA kala bthah ba baroh kito ki ban ia khun ia ka election, bad ia ki seng sain pyrthei ba ki hap ban bud.
La bthah ia ki Deputy Commissionor bad ia ki Returning Officer ba kin pynbeit ia ki kali ba katno tylli ki kali ki lah ban pyndonkam da ki kyrtong ha kane ka election bad ki kyrtong ki hap ban da ioh ia ka jingbit ban pyndon kam ia ki tyndong jingpynsawa ha kane ka election.
Da kane ka jingpynbna ba la pyntreikam ia ka Model Code of Conduct, yn nym lah shuh ban pynlait pisa na ka skhim jong ki MLA, MP, lane ki skhim jong ka sorkar jylla lane jong ka sorkar pdeng, na kano kano ka tand sorkar haduh ban da dep kane ka elelction.
Lada ki don kino kino ki jingtrei kiba la dep ban ai hukum ban trei hynrei kiba khlem pat sdang, kum kine ki jaid jingtrei ki hap ban sdang ynda la dep ka election bad lada don ki jingtrei kiba la dep ban sdang shuwa ban pynbna ia kane ka jingpynbna sorkar kila ban trei.
Kano kano ka jingialang ban buh Mawnongrim ia kano kano ka skhim thymmai hapoh jong ka District Khasi Hills bad Jaintia Hills dei ban buh teng shuwa noh ia baroh kat haduh ban da dep kane ka election . Kane kan long ruh kum juh ia ka KHADC bad ia ka JHADC ba kin nym lah ban pynbna skhim thymmai lane ai jingtrei thymmai, lada don dei ban buh tengnoh haduh ban da dep ka election.
Kane ka jingbethah kan treikam tang ha kito ki constituency ki ban don ia ka election shiteng samoi, ym ha baroh jong ka District. Ia ki kali kiba la ai sha u CEM lane sha u EM, Chairkman bad kiwei kiwei kiba dei jong ka KHADC bad JHADC , yn nym shah ban pyndon kam da ki kyrtong ban ia khun ia ka election. La sah ban rah pisa tang haduh T.50,000/- tyngka da ki kyrtong lada lap palat ia kata yn knieh noh.
