Shillong, Lber 08: Mynta ka sngi ka sorkar Meghalaya ryngkat bad ka pyrthei shityllup kala pynlong ia ka jingrakhe ia ka sngi burom ba kyrpang jong ki Kynthei da ka jingiatreilang bad ka Meghalaya State Rural Livelihoods Society ban rakhe ia kane ka sngi ia kaba la pynlong ha State Convention Centre, Shillong.
Ha kane ka sngi ka tnad Social Welfare Department government jong ka sorkar Meghalaya kala pyndon burom ia ki Kynthei kiba la pynsah nam ia lade da kaba kila ioh ia ki khusnam jong ka jingjop jong ki ha ki kyrdan bapher bapher kum ki kynthei.
Haba kren ha kane ka sngi kum ka kongsan ka Dr. Ampareen Lyngdoh kala ong ba ka jingkiew jong ki kynthei kumba ka long mynta bad baroh ki kynhun kila ia treilang ban pynioh ia ka hok jong ki kynthei. Ia kane ka sngi la don kam ban rakhe da baroh ki kynthei wat ki khynnah kynthei ha ki iing ki sem.
La ong ba ka sorkar Meghalaya kala mang pisa haduh T.5271 klur ba ka bynta ban kyntiew ia ki kynthei bad kane ka burom ka leit sha baroh kito kiba la don bynta ha kane ka jngialeh ban kyntiew ia ki kynthei.
Ka myntri kala ong ba don kam ban ailat ia ki kynthei ba kin ia shim bynta ha baroh ki liang ba kin lah ieng hala ki jingki kjat ha ka ioh ka kot bad ka long ka jingshisha lada ki long kmie ki kiew ka iing ka sem ka kiew ha ka ioh ka kot, na ka sorkar kan pynlut 18% na katei pisa ha ka koit ka khiah ia ki kynthei.
Kiba la shah pynkup burom ha kane ka sngi namar ka jinglah jong ki ban pynsah nam ia lade ki long ka Nambi Jessica Marak , Kong. Kmoin Wahlang bad kong. Bonifilia Shullai, kong. Sidalin Marbaniang, ka. Ratna Rai, bad ka kong Pdiangsngewbha Pohti, kine kila pynsah nam ia lade ha ki kam bapher bapher.
Ha kane ka sngi la don lang ka kong Santa Mary Shylla ka shongknor jong ka Handicraft bad Handloom, u Pravin Bakshi Commissioner bad Secretary Social Welfare Department lem bad kiwei kiwei ki heh sorkar kiba la don lang ha kane ka sngi rakhe ia ka sngi burom ki kynthei.
