Shillong, Naiwieng 14: Ka Bansara Eye Care Centre (BECC), Society for Promotion of Eye Care & Sight (SPECS), World Diabetes Foundation bad Meghalaya Women’s Alliance ki la rakhe ia Ka World Diabetes Day da kaba pynlong da ka Global Diabetes Walk mynta ka sngi.
Kane ka Jingiaiaid Kjat ka la sdang na Madan Iewrynghep, Shillong ha ka por 7.30 mynstep ha kaba la don kumba palat 250 ngut kiba la ia wan shim bynta. Ha shwa kane, la ioh ka jingkren maitphang lyngkot halor ka jingdonkam ban rakhe ia ka sngi kyllen satlup ka pyrthei kum ka dak ban pyntip paidbah solansar shaphang ka jingshyrkhei bad jingma ba kane ka jingpang shini ka lah ban ktah ia ngi bad kumno ban sumar pat na I Medical Director Ka Bansara Eye Care Centre, Dr. J. V. Basaiawmoit. Kane ka Jingiaiaid Kjat la kaweh pynhap lama da U Kongsan Bah Neil Antonio War, (MDC), Laitumkhrah.
Ha kane ka Jingiaid Kjat la wan ia shim bynta da ki Nurse jong ka Dr. H. Gordon Robert Hospital, Woodland Hospital, Ganesh Das Hospital, Rapsbun School of Nursing, Civil Hospital bad ki khynnah pule jong Ka English & Foreign Language University, St. Edmunds College, Martin Luther Christian University, BIOS, Meghalaya Women’s Alliance bad Jingiaseng Kynthei Balang Presbyterian Nongkseh.
Kane Ka Jingiaid Kjat la pynkut biang ha Madan Iewrynghep ha kaba ki khynnah pule St. Edmunds College ki la pyni shynna da ka Skit shaphang ka jingpang Diabetes bad ki jingeh jingshitom ban gin ioh kaba lah ban lam shaduh kaba matlah syndon bad ktah ia kiwei de ki dkhot met ba donkam. Ki la batai ruh kumno ba ngin kiar na ka bad ban sumar da kaba bam ki jingbam lada la ioh kem pang shini. Ki khynnah pule bad nurse na Civil hospital ki la ai ka phawar hoi kiw ha ka ktien Khasi shaphang ka jingma jong ka jingpang shini. La sam ruh ia ki syrnod ia shim bynta sha baroh kiba la wan ban ia shim bynta.
Hadien kane ka Jingiaiaid Kjat (Walk), Ka Team jong Ka Bansara Eye Care Centre ki la pynlong ruh ia ka screening bad test chat ia ki nongpang ioh ki don ka jingpang shini ha Civil Hospital Shillong. Ia kane la ialehlang bad ka NCDS halor ka phang “Diabetes Screening Camp” ha kajuh hi ka sngi.
