Nongstoin, Iaiong 27: Niuh Kjat U Vice President Judo Federation of India & National Kickboxing Federation of India Bad I Kong Dr Fenella L Nonglait Ha Nongstoin
Hadien ba la dep pynlong ia Ka Free Demonstration cum Judo Camp ha Nongstoin dang shen hapoh ka jingpyniaid Ka Ophis U District Sport Officer Nongstoin bad Ka Meghalaya Judo Association hapoh ka jingialam lynti jong ka Directorate of Sports & Youth Affairs, la ioh pat ban ia syllok biang bad ki khynnah judo ha Nongstoin ha kaba la ia don lang U Vice President Judo Federation of India (JFI) Bah Larry P Warjri, Vice President National Kickboxing Federation of India (NKFI) Bah Donny Ranee, Bah Boney Kharbani President West Khasi Hills Judo Association (WKHJA), Bah Balamphang Kharkongor bad I Dr Fenella L Nonglait.
La ioh ka jingkren jingpynshai bad jingkyntu jingkynpham shaphang ka jingmyntoi kaba ngi ioh na ki jingialehkai martial arts kum ka judo, kickboxing, wushu, jeet kune-do bad muaythai ha kaba ia dei bad ka jinglong jingim adkar kaba man la ka sngi (discipline), ka jingkoit jingkhiah bad ki lad ioh kam ioh jam lyngba ka sports bad ki lad jingpule kiba lah ban ioh sha ki kyrdan kiba kham shajrong.
Ka Dr Fenella i la pynshai ba shen yn sa pynlong ki program kiba ia dei bad ka ain ha kaba yn lah ban teh lakam bad iada khambha ia ka jingshah leh donbor ia ki kynthei bad ki khynnah ym tang da ka jingialehkai sports (martial arts), hynrei kumno ruh ban pynshlur ia ki ban mih shakhmat ban ym set tang halade hynrei ban ialeh pyrshah ia ki jingsniew bad jing shah thombor lyngba ki bor kiba ka ain ka don ban tehlakam kaba la buh kyrpang na ka bynta jong ki. Lada ka Mary ka lah ban iada ialade da ka martial arts, katto tam haba don ka ain bad ka hok kaba lah ban iada ia ki kynthei bad khynnah.(SP News)
