Shillong, Iaiong 08: Ka Seng Khasi Kmie, Shillong ka la їoh їa ka khubor ba sngewsih halor ka jingkhlad noh jong u Rangbah Sumar Sing Sawian ha ka 7 tarik u Ïaїong, 2023. Ka Seng ka la pynlong їa ka jingїalang sngewlem ha ka step jong ka 8 tarik u Ïaїong, 2023, ha Seng Khasi College, Jaїaw.
Ha kane ka jingialang sngewlem ban long la sha ka sngi ka long ban pyrto їa u synñiang u bynhei uba une u Rangbah u la noh sha ka Seng ha kiba bun ki liang bad ka jingїalang ka la pynlong їa ka jingsngapjar kaba shipor kum ka dak ka jingburom їa une u Rangbah bad ban duwai ruh na ka bynta ka mynsiem ka jong u.
U Rangbah Sumar Sing Sawian, u dei u rishot, u bah tympan bad u pynїar jong ka Seng Khasi Kmie da ki bun bun tylli ki snem, u la long u Dkhot barim jong ka Jylli Pyrkhat Kam (JPK) jong ka Seng Khasi Kmie da bun snem bad uba la trei borbah ban pynneh pynsah, pynphuh pynphieng bad pynїar їa la ka Niam Tynrai lyngba ki jingthoh kiba mih na ka mut ka pyrkhat pyrkhat ka jong u.
Kum u Dkhot jong ka Literary Committee, Seng Khasi Kmie, une u rangbah, u la synñiang shibun ki jingthoh ha “Ka Sneng Khasi” bad u la long u Dkhot jong ka Editorial Board ha man la ki khep ba ka Seng ka pynmih їa ki Thup Sah Kynmaw. U Rangbah Sumar Sing Sawian, u їai pynshai lyngba ki kot khubor їa ki matti bad nongrim jong ka Seng ha man la ki khep.
Ka ban sah kynmaw ha ki pateng pakit jong ka Seng Khasi Kmie, ka dei ka jingsngewthuh bad shemphang jong une u Rangbah ha kaba їa dei ban ki parom shaphang jong U Lum Sohpetbneng uba kyntang.
U la long uwei na ki rangbah kiba donkti naduh ba sdang ban pynїoh їa ka kliar jong u Lum Sohpetbneng bad ka Seng ka la thung ïa u kum u Secretary ba nyngkong eh jong ka Lum Sohpetbneng Committee, Seng Khasi Kmie.
La ong ba naduh ba la thaw їa ka, ha ka 30 tarik u Ïaїong, 1990 bad u la bat da bun bun snem bad u la long ruh u Chairman barim jong kane ka Committee. Hapoh ka jingïalam ka jong U, la lah ban pynlong ïa ka Kiew Pyneh Rngiew ba nyngkong eh ha kliar u Lum Sohpetbneng ha ka 20 tarik u bnai Rymphang 2000.
Ha kaba ki khun ki hajar ki it ki hima ki elaka jong ka ri Hynñiewtrep ki la wan ban ïa shim bynta. Ban pyrto ïa ki kam ba khraw jong une u Rangbah, ka Seng Khasi Kmie, ka la pynkup burom ïa une u Rangbah, ha ka jingrakhe ïa ka Seng Kut Snem kaba la long ha ka 23 tarik Naiwieng , 2022.
Ha kum kane ka por kaba ka їing ka sem ka їa kynduh їa kum kane ka jingjia kaba sngewsih, ka Seng Khasi Kmie ka phah їa u kyrwoh sngewlem sha ki khun ki kti, kiba ha їing ha sem jong une u Rangbah.
Ka seng kala buh lang ruh ïa ka kyrpad kyrpon, ka duwai ka phirat ba ka mynsiem ksiar mynsiem rupa ka jong une u Rangbah ba la leit bam kwai ha dwar U Blei ba kan poi suk poi saiñ bad la ki dot ki їaw bad ba ka rngiew ka rwiang kan synran synriah bad aibor aibuit їa baroh kiba don ka jingїadei kaba jan bad u, ia kane ka kyrwoh la phah da u bah Hainess Marbaniang General Secretary Seng Khasi Kmie,
