Shillong, Rymphang 02: U nongialam ka kynhun United Democratic Alliance (UDA) hapoh jong ka KHADC u bah Titosstrwell Chyne ba dei ruh u CEM u la khot ia ka jingialang ka kynhun la shai ka sngi ban ia kren ia ki kam jong ka kynhun synshar, la pyntip u bah Pyniaid Syiem.
Haba kren ha ki Lat pathai khubor u bah Pyniaid u la iathuh ba u la phah ia ka shithi iehnoh kam jong u kum u shongknor ha ka 31/1/2022 bad ha ka 1/02/2022 la pdiang da u Symbut shnognknor bad la phah ia kane ka kam sha ka tnad DCA jong ka sorkar jylla ban pyntip sha u Lat jong ka jyllla.
U Bah Pyniaid u ai khublei kyrpang ia ki MDC baroh kiba la ai ka jingiatreilang hapor ba u long u Shongknor ka iing dorbar thawain ain ha KHADC kiba la ai ka jingiatreilang ha baroh ki liang, ka jingai khublei ka long ia baroh kiba la ai ka jingiatreilang.
Haba phai sha ka jingienoh kam ka jong u la ong ba ha dien ka jingiakren hapoh ka Parliamentary Party jong ka NPP la tyrwa ba ia ka kam Shongknor ha KHADC dei ban aiti noh sha u Bah Lamphrang Blah namar u dei u MDC bala rim tim hapoh ka iing dorbar.
Haba ia dei bad ka ilekshon ban jied ia u Shongknor ka iing dorbar jong ka KHADC ia mynta ym pat lah ong, ynda la mih ka jingpynbna ia ka jingieh kam ka jong ki yn sa la lah ban sngewthuh lano kan long ka ilekshon.
