Shillong,iaiong 17: Ka KJP Assembly mynnin ka sngi ka la shimti biang ia ki iing ki sem bad ki jingdon jingem ha Central Ward, IGP Point, kiba la pyn donkam da ka Martin Luther Christian University (MLCU) naduh ka snem 2005.
Kane ka jingshimti ka KJP Assembly ia kine ki iing ka long hadien ba ka rai kaba la shim ha ka snem 2012, ba ka KJPA kan nym iadon bynta eiei ei shuh bad ka MLCU, namar kiba bun ki kynrum kynram kiba la mih ha ka jingtreikam ka MLCU.
Kum ka dak ka jingshimti biang ia kine ki iing, la pynlong ia ka jingiaseng duwai ha kaba la iadonlang u Moderator ka KJP Assembly, u Rev DS Sohkhlet, u Senior Administrative Secretary ka KJPA, u Rev NS Phawa, u Chairman ka Trust Committee ka KJPA, u Rev W. Warbah, Revd Dr. MJ Hynniewta, Principal ka JRTS Mawklot, ryngkat kiwei kiwei pat ki Pastor bad shibun ki dkhot ka Balang Presbyterian na Khasi Jaintia Hills.
Haba kren ha kane ka jingialang, u Pastor Phawa, u la ong ba ka jingshimti biang ia kane ka iing ka long hadien ba la iapynbeit bad ka MLCU ha ka 14 tarik mynta u bnai ryngkat ka jingiatrei lang u Vice Chancellor ka MLCU, u Bah RG Lyngdoh. U Pastor Phawa u la ai khublei ia u Bah Lyngdoh, uba la shimkhia ban pyndep ia ka jingaiti biang ia kane ka iing jong ka KJPA, kaba dei ka trai jong ka.
U Pastor u la ong ba ka KJPA kam shym la leh kano kano kaba bakla ha ka por ba ka ai pyndonkam ia kine ki iing sha ka MLCU namar ha kaba sdang ka long kaba biang, tad haudh ban da mih ki kynrum kynram hadien.
`Ka la long shisha ka jingsngewdiaw bad ka jing sngewsih ia ka Balang halor kane ka jingjia, hynrei ngi dei ban ainguh ia U Blei ba Um shym la iehnoh ia ka Balang bad ka la ioh biang ia ka hok jong ka, kaba ngi la jan long nongwei ha kine ki khyndiat snem baladep`, u la ong.
U Pastor Phawa u la ong ba ka jingshimti ia kane ka iing kam pat dei kaba kut, hynrei kadei tang ka jing sdang, namar ka KJPA ka dang dei ban ioh ia ka baiwai na ka MLCU kaba la bun bha, nangta ban pynkylla ia ka ai� kaba la pynlong ia ka MLCU, ha kaba ka KJPA ruh kadei ka iadon bynta.
`Ngi la phah kumba hynriew tylli ki shithi bad iakynduh ruh ia ka sorkar halor kane, hynrei haduh mynta kam pat seisoh. Nga kyntu ia ki Parabangeit ban iai buh ha ki jingduwai na ka bynta kane`, la ong u Pastor Phawa.
Haba pynshai ia kane, u la iathuh ba ka jingiakynduh ba khatduh bad u Myntri Rangbah, u Dr Mukul Sangma, ki la ioh jingkyr men bha, namar u la kular ban rah ia kane ka kam ha Iingdorbar Thawai�. Hynrei ym tip na kaei ka daw pat um shym la rah. `Wat la katta ruh ka ka KJPA kan iai buddien ia kane ka kam`, la ong u Pastor Phawa.
Ha kane jingiaseng la ioh ruh ia ka jingduwai na u Pastor P. Hynniewta bad ka jingrwai kyrpang na ki nongsah ha New Hope Centre, kaba dei ka project treikam jong ka KJPA.(SP News)
