Shillong, Lber 11: U Bah Pyniaid sing Syiem CEM jong ka KHADC haba jubab ia ka jingkulli kaba la wanrah da u bah Teinwell Dkhar ha kaba ia dei bad ka baibam jong ki nongtrei ka KHADC ynda kila shong thait na ka kam la ong ba kin ioh ia ka bai bam tang san snem na ka sngi kaba kila shong thait.
Kane ka long katkum ka rule kaba ia dei bad kiba la shong thait Rule 36(1) jong ka kyndon kaba VIII jong ka Khasi Hills Autonomous District Council Service Rule 1961, la ong ba katkum kane ka rule ka long ba kin ioh san snem ka bai bam tynmen, lada don kiba khlad ha ka kam kin ioh 30% na ka jingsiew na ka bynta 10 snem.
Halor kane u bah Teinwell Dkhar, u la kyntu ia ka EC da kaba ong ba lada ki MDC ki jop tang san snem kin ioh ia ka bai bam shirta, kan bha lada ka EC kan ai ia kane ka juh ka jingmyntoi sha ki nongtrei ka KHADC.
Na ka liang jong u bah Titosstarwell Chyne u la kyntu ia ka EC ba kan pynkylla ia kane ka Service rule na ka bynta ki jingmyntoi jong ki nongtrei namar ki ioh ba ki don shisha kiba ia kynduh jingeh ha dien ba kila shong thait.
Haba jubab ia kitei ki kyrpad jong u ki ar ngut ki MDC kiba dei ruh ki CEM barim jong ka KHADC, u bah Pyniaid la ong ba ia mynta ki but ia katei ka rule ba ki nongtrei ka KHADC ki ioh ia ka bai bam tynmen san snem bad u CEM u la ong ba la pdiang ia ka jngmut ki kdhot ka iing dorbar.
U Bah P.N Syiem Deputy CEM ba dei peit ia ka tnad elaka haba jubab ia ka jingkylli jong u bah Titosstarwell Chyne ha kaba ia dei bad elekshon ban jied ia u Wahadadarship ha Shella Confederacy, la ong ba ka EC kala shim ia ka rai ba pynlong noh ia ka elekshon hapoh shibnai shiteng.
