Shillong, Kyllalyngkot 17: U president jong ka BJP Meghalaya State Unit u Bah shibun Lyngdoh u la ther kylla ia ka seng Congress, da kaba ong ba ka seng Congress ka pyndon kam ia ki mynder Ri ba kin long ka Vote Bank, kane ka jingkren jong u tei u nongialam jong ka seng BJP ka long halor ka jingkynnoh jong u myntri kam ia leh kai ka jylla u Zenith Sangma ba ka BJP ka don jingiadei bad ka RSS.
Haba kren ha ki nongthoh khubor mynta ka sngi u Bah Shibun u la ong ba ka seng BJP bad ka seng RSS ki long la ka jong kam don jingiadei ei ei ruh em, kum ki paidbah jong ka Ri India kiba don ia hok ban thep vote ym shym la khang ia ki ba kin kyrshan ia ka Congress ne ia ka BJP ka ei ka hok jong ki ban vote.
La ong ruh ba la da u myntri u kam ialehkai ka jylla u dang iai beteng ban kynnoh b aka BJP ka don ka jingiadei bad ka RSS, kum ka seng kan hap ban pan ia ki jingpynshisha ryngkat ki sabut, Ka seng BJP ka dei ka seng sain pyrthei bad baroh ki paidbah nongshong shnong jong ka Ri India ki lah ban kyrshan ia ka.
Na ka liang jong u Vice president jong ka BJP u Gagan Jain u la ong ba u Zenith Sangma u la dei ban da bishar bniah shuwa ban kren ia kum kine kiei kiei baroh. Lad aka Congress ka ong ba RSS ka trei shitom na ka bynta ka BJP, kin sngew kumno lada ong b aka Congress ka pyndon ia kam ia ki mynder ban long ka vote bank jong ki.
Ha kane ka sngi la pynbna ruh b aka BJP kan plié ia ka ophis jong ki la ka jong ka iing ha Tura ha ka 21 tarik mynta u bnai ha kaba ki nongialam jong ka seng kin sa wan, kum u Ram Mahdev Political Secretary jong ka seng , u Nalin Kholi nongai ktien jong ka seng bad u Prashnat Arora coordinator jong ka dong shatei lam mih ngi.
Ha katei ka sngi ka Central Executive Committee jong ka seng ruh kan sa shong pyrkhat kam bad kin sa shim ia ki rai kiba ka party kan sa iaid sha khmat kumno ban leh. Haba ia dei bad ka jingshah leh bein jong ki kynthei kane ka kren shai ba ka sorkar kam shym la lah ban the la kam ia ki jingsniew ha kaba u MLA ba don ha ka sorkar u la long u ba shah kynnoh.
Ka BJP ka sngew khia jur ruh ia ka jingpynkhein ia ka hukum jong ka NGT kumba la paw ha ki kot khubor, ha ka jingshisha ka iing bishar ka la ai lad ban kit ia u Dewiong ba la dep ban tih bad kane kan wanrah ia ka jingmyntoi ia ki paidbah bad kum juh ia ka sorkar hynrei ka long da khongpang ha kaba ka don ka jingialeh klumar ha kaba ia dei bad ka jingkhrong khajana. Haba la buh ban kit khyndai tone ki kali ki kit palat sha ei ka pisa ba tam ka leit.
