Tura, Jylliew 23: U wei u lehnoh jong ka seng United Achik Liberation Army (UALA) u la ioh ban phet na ka jaka ai jingsumar jong ka sorkar ka Tura Hospital, une u ba la lait phet la tip kyrteng kum u Rex Miller R. Sangma ia u la kem ha ka 18 tarik mynta u bnai.
Ia u la kem na Kharkutta jong ka North Garo kum ka jingtip kaba la ai da u wei u dkhot jong katei ka seng u Grikseng Sangma, u ba la shah kem ha ki pulit na ka iing kaba sah ha ka shnong Araimile.
Kine ki ar ngut ki lehnoh jong ka seng UALA Rex Miller bad Grikseng la kem ia ki ha ka juh ka seng bad ki pulit kila ioh ban bat ha kti jong kin a ka bynta san sngi bad ia kine la phah sumar hapoh Tura Hospital ha ka 20 tarik mynta u bnai.
Halor kane ka jingjia u Addition SP jong ka West Garo Hills, Bruno A Sangma u la ithuh ba la weng kam ia 7 ngut ki pulit langrut kiba la buh ban ap ha katei ka jaka. La ong ba mynta ki dang ap ia ka kaiphot ba kumno une u lehnoh u lait ban phet na katei ka jaka, la ong u Sangma.
Kane ka jinglait phet ka jong u tei u lehnoh ka la jia ha ka por saw baje mynta ka sngi, ka nurs kaba trei ha katei ka jaka kala iohi ba u mareh hynrei ki pulit kim shym la ioh ban kem biang ia u.(SP News)