Shillong, Lber 07: Kawei ka samla Khasi kaba dei na ka thain East Jaintia Hills District kala im na ka kti jong ki briew kiba donkti ban khaïi met, hadien ba kala lait phet ban ioh ruh ka jingiarap na ka seng ki samla pule Khasi Student Union Delhi Unit bad ruh ka jingkloi ban iarap ki pulit na Delhi.
Katkum ka kyrwoh khubor na ki nongialam ka KSU Delhi Unit, la iathuh ba ka seng ha ka 7 tarik mynta u bnai Lber kila ioh pdiang ia ka telephone ha kaba iadei bad ka jingjia kaba iadei bad kawei ka longkmie kaba la lait phet na ka jingshah thmu ban khaii briew.
Katkum ka kyrwoh na ka samla Marbiang Khongwir, President bad u samla Nicholas Chyrmang kum u Secretary kila iathuh ba mar ia poi ha katei ka jaka, ka seng ka la ioh jingtip ba katei ka longkmie kaba don kumba 35 snem ka rta ka dei kaba wan na East Jaintia Hills bad ka la wan sha Delhi hadien ba la kular ia ka ban ioh ia ka kam kum ka nongtrei iing briew.
Hynrei mar ia poi, la leit shaw ia ka da uwei u briew bym tip dei mano uba la kam ba un ialam ia ka sha ka jaka trei jong ka, hynrei donbok ba ka don ka maia sngewthuh ba une u briew uba wan shaw u pyrshang ban die noh ia ka, hynrei ka la lah ban phet krad.
Ka President jong ka KSU Delhi Unit ka samla Marbiang Khongwir bad u Organizing Secretary u Julian Thabah ryngkat bad ka SPUNER ki la poi mar mar sha steshon rel Old Delhi bad ki la iarap ia ka ban ai kaiphod ha thanat jong ki pulit katei ka jaka.
Hadien ba la pyndep ia baroh ki jingdonkam ha thanat, ki dkhot, ba la ialam da ka President, ki la shim ia ka jingkitkhlieh ban pynthikna ba kan wanphai biang sha la ka jong ka shnong. Ka Seng ka pynpaw ka jingsngewnguh ïa u Bah D. Dkhar na Raliang, u SPUNER, bad ki pulit ka nongbah Delhi kiba la kloi ban ïarap ïa kane ka kam.
Nalor kata, ka seng ka ai khublei kyrpang ïa ka Bah Wailadmiki Shylla, MLA ka Jowai Constituency uba la ai jingïarap pisa ban pynsuk ïa ka jingwanphai jong ka sha la ïing. Ka Seng ka ju ïakynduh ïa kum kine ki khep bad ka kyntu ïa ki paidbah ka jylla ba kin long kiba husiar bha haba wad ïa ki lad ïohkam ïohjam shabar ka jylla Meghalaya ong ka kyrwoh.
Halor kine ka seng ka jingmut jur ia ki briew ban long kiba husiar bad ban shim ia ka jingkitkhlieh kaba pura na ka bynta ka jingshngain jong ki bad ki khot ki wer ïa ki paradoh parasnam kiba wad kam sha Delhi ne ha ka thaiñ NCR ba kin pyntip sha ka Seng shwa ban pdiang ïa kino kino ki jingtyrwa kam na ki Agent.
