Shillong, Kyllalyngkot 09: U bah Londoner Sohtun u ba dei peit ia ka lad pathai khubor jong ka seng HSPDP, mynta ka sngi u la ong b aka jingbeh saspon ar snem ia u Bah Pyniaid Syiem MDC jong ka seng ka long halor ki nongrim kiba ka seng kala lap ba u la ialeh pyrshah ia ka seng ha kiba bun ki liang.
La pynshai ruh b aka jingkynnoh ha kine ki sngi ha ki lad pathai khubor ba seng HSPDP kam juh beh seng ha ka por jong u Ma ieit Hoping ka long kaba bakla, ha ka por jong u la beh ia u Bah DT Wanniang bad ia ka kong Fenela L Nonglait, katba ka ha por jinglong president u Bah Ardent Basaiawmoit kam pat don ka jingbeh seng hynrei tang ka jingsaspon.
Haba ia dei bad u Bah L G Nongsiej bad bah Morningstar Mawsor, la ong ba kine ki ar ngut ki MDC kila mih hi da ka mon jong ki ban leit kyrshan ia ka EC jong ka seng Congress, kine ki ar ngut ki MDC kim dei shuh ban dang kam ba ki dei ki dkhot jong ka HSPDP.
Haba jubab pat ia ka jingkylli halor ka jingleit kyrshan jong ka HSPDP ia ka EC bala ialam da u Bah PN Syiem hapoh KHADC kaba dei ka Kynhun PDF, u Bah Sohtun u la ong ba ka jingleit kyrshan jong ka seng ia ka PDF ka long “ Ban khanglad ia u nongshun ka jaid bynriew ban long CEM”.
Haba la kylli da ki nongthoh khubor u ei u ta u nongshong ka jaidbynriew bad kiei ki kam kiba u la leh, ha kaba sdang na ka liang jong u Bah Sohtun u la kyntait ban iathuh kyrteng, hynrei ha dien u la ong, “ U dei u Bah HS Shylla u nongshun ka jaidbynriew namar ba u kwah ban tih Uranium”. Ka seng HSPDP ka pyrshah jur ia ka jingtih Uranium.
Haba ia dei bad ka kong Badariti Lyngdoh Nonglait, u Bah Sohtun u la kren shai kdar ba kam dei ka dkhot jong ka seng HSPDP.
