Shillong, Naiwieng 15: ka jingialang ba saw sngi jong ki IsG BSF bad Region Comdrs BGB ba dei jong ka border Coordination Conference kala sdang mynta ka sngi ha Shylet, Bangladesh bad kan kut ha ka 18 tarik mynta u bnai. Kane ka jingialang ka long ban ia kren ia ki kam khappud hapdeng ka India bad Bangladesh kiba dei hapoh kane ka dong shatei lam mih ngi jong ka Ri India.
Kane ka kynhun shipai BSF jong ka Ri India ki ia don 18 ngut baroh kiba leit sha kane ka jingialang hapoh ka jingialam jong u P K Dubey, IG BSF, Meghalaya Ftr, la don lang u Jai Bhagwan Sangwan, IG Tripura Ftr, u N S Jamwal, IG, Mizoram bad Cachar Ftr ryngkat ki ophisar .
Katba na ka liang jong ki BGB pat yn lam khmat da u Qazi Masroor Ullah, Additional Director General Region Comdr, North East Region, Sarail jong ka Border Guard Bangladesh bad Region Comdr, South East Region, jong ka Chittagong.
Ha kane ka jingiakynduh jong ka Border Coordination Committee kin ia kren halor ki kam sniew kiba jai ha ki khappud jong kine ki ar tylli ki Ri bad ka jingpynkhein ha kaba ia dei bad ka jingshna ia ki Inspection Bungalow kiba don ha khappud jong ka jylla Meghalaya, Assam, Tripura bad Mizoram bad ka jingiakren kan long ruh halor ka jingdon jong ki seng lehnoh ha ka thie ka RI Bangladesh.
