Shillong Iaiong 25: Da ka jingthrang ka mynsiem na ka bynta ban kyntiew ha ki liang baroh iala ka jong ka Constituency bad ruh ban pynsaphriang ia ka jingtip sha ki paidbah ha kaba iadei bad ki scheme bapher bapher na ka bynta ka jingmyntoi jong ki paidbah u MLA ka Mawsynram u Bah Himalaya Shangpliang u la lumlang ia ka jingialang kaba kyrpang bha hynne ka sngi.
U MLA jong ka Mawsynram u Bah Himalaya Shangpliang hynne ka sngi u la lum lang ia baroh ki Rangbah Shnong bad ki nongkitkam shnong jong ka Mawsynram Constituency hi baroh kawei lem bad ki baroh ki ophisar kiba don hapoh jong ka Mawsynram C&RD Block.
Ka jingthmu ba ha khmat eh jong kane ka jinglum lang ka long ban iakren ia ki kam pynroi bad ia kiwei de ki jait scheme kiba dei napoh jong ka Block.Ia kane ka jingialang la pynlong ha ka shnong Mawsynram hynne ka sngi hapoh ka Indoor stadium.
Ha kane ka sngi da ki spah spah ngut ki Rangbah Shnong kumjuh ruh bad ki Secretary Shnong kiba la wan poi sha katei ka jingialang ha kaba kila ioh ruh ia ka jingpynshai kaba janai bha na baroh ki ophisar kiba don hapoh jong ka Block lyngba ki tnad bapher bapher.
Haba kren ha kane ka jingialang kum u Kongsan u Bah Himalaya Shangpliang u la ong mar shu dep kut ka Assembly nga la sngew donkam ban ia kynduh bad ki khlieh nong synshar shnong bad nga la phah ia kane lyngba ka BDO ban khot bad ban lum lang ia baroh ki Rangbah Shnong bad ki Secretary Shnong ban iakren halor ka kam pynroi hapoh jong ka Constituency.
“Nga la phah ban lum lang ia kane ka jingialang ka daw ka long ba nga kwah ban iakren ia ki kam pynroi bad kumjuh ruh ban pynphriang jingtip ia kiwei de ki scheme kiba dei napoh jong ka Block bad kumjuh ruh ban twad jingmut na ki Rangbah Shnong halor ki kam kiba la pyntrei bad ban tip ruh ki long kumno” ong u Bah Shangpliang.
Haba kynthoh halor kane ka jingialang u Bah Shangpliang u la ong ba “Kane kan dei ka sngi ba ngin pyntyllun noh ia ki kam hapoh jong ka Constituency hi baroh kawei bad u la ong ruh ba lyngba jong kane ka sngi kan don ruh ka jingiajan hapdeng jong phi ki paidbah bad ki ophisar kiba don hapoh jong ka Mawsynram C&RD Block”.
U Bah Shangpliang u la pyntip ruh ba ha kane ka Assembly kaba dang shu kut shen u la rah ia kiba bun ki mat na ka bynta ban wanrah ia ka jingmyntoi ia ki paidbah jong ka Constituency kum ha kaba iadei bad ka umbam umdih, ka jingkiew ka bail light ka jingduh jong ki transformer, ha kaba iadei ba rep ka riang ki lynti ki surok badkiwei kiwei de ki mat.
U Bah Shangpliang u la pyntip ruh ba un sa sdang noh shen ia kawei ka prokram bad ia kane ka prokram la tip kum ka “Meet the People” lane “Ia kynduh ia ki paidbah” na ka bynta ban pyntip paidbah ha kaba iadei bad ki scheme kiba don.
“Ia kane ngan sdang ha ka 2 tarik u bnai Jymmang bad ia kane ka prokram ngan sdang shwa na Lawbah ban ia kynduh ia ki paidbah na ka bynta ban pyntip sha ki paidbah ia ki scheme bad hadien ba nga la ioh ia ka jingdawa na ki paidbah ngan sa rah bad ban pyntip sha ki ophisar bad ki ophisar kin sa leh ia kaba donkam ka jong phi ki paidbah” ong u Bah Shangpliang.
Hadien ka jingkren jong u Bah Himalaya Shangpliang la ioh pat sa ka jingpynshai kaba janai bha ka Kong EL Warjri iba dei i Block Development Officer (BDO) ka Mawsynram ha kaba iadei bad kiba bun bah ki jait scheme bapher bapher bapher kiba dei ki schem na ka sorkar pdeng bad kiwei de.
Hadien jong i BDO la ioh pat sa ka jingpynshai na man la ki ophisar kiba dei na ki tnad trei kam bapher bapher kiba don hapoh ka Mawsynram Block bad bud pat sa ka jingkylli kaba la buh da ki Rangbah ha kaba iadei bad ki scheme bapher bapher.
Hadien ba la ioh ia ka jingpynshai na baroh na ka liang jong u Bah Shangpliang u la kyntu ia ki Rangbah ba kin pyntip ia kane sha ki shnong ki thaw bad kumjuh ruh ia ki VEC jong ki shnong ba kin thaw ia ki lad ki lynti kumno ban dang pyntyllun shuh shuh ia ki kam ba bha hapoh ki shnong ki thaw.
